علامہ اقبال دے کلام کوں فن دے ذریعے دنیا اچ متعارف کرویسوں، وفاقی وزیر اورنگزیب خان کھچی

اسلام آباد۔ 10 ستمبر (اے پی پی) وفاقی وزیرقومی ورثہ و ثقافت اورنگزیب خان کھچی آکھیے جو علامہ محمد اقبال دے فکر و فلسفے کوں فن دے ذریعے پیش کرݨ ہک منفرد تے موثر کاوش اے تے حکومت اقبال دے پیغام کوں دنیا اچ متعارف کراوݨ کیتے ایہوجیھے فن پاریں کوں ٻاہرلے ملک نمائشاں اچ وی پیش کرݨ دی کوشش کریسی۔ انہاں اے ڳالھ نیشنل انسٹی ٹیوٹ آف فوک اینڈ ٹریڈیشنل ہیریٹیج (لوک ورثہ) تے آف گرڈ سٹوڈیوز دے اشتراک نال منعقدہ پینٹنگ تے آرٹ نمائش ساقی نامہ دی افتتاحی تقریب نال خطاب کریندے آکھی۔وفاقی وزیر لوک ورثہ ہیریٹیج میوزیم اسلام آباد اچ نمائش دا افتتاح کیتا۔اے نمائش عظیم مفکر تے شاعر علامہ محمد اقبال کوں خراجِ عقیدت پیش کرݨ کیتے منعقد کیتی ڳئی جیندے اچ معروف فنکاراں گیتی آراء، لبنیٰ جہانگیر تے زارا حیدر بابری دے فن پارے نمائش کیتے پیش کیتے ڳئے۔ وفاقی وزیر اورنگزیب خان کھچی نمائش اچ رکھیے ڳئے فن پاریں دی تعریف کریندے آکھیا جو انہاں کوں آرٹ ورک ݙیکھ تے بے حد خوشی تھئی۔ انہاں آکھیا جو فنکاراں علامہ اقبال دے کلام تے پیغام کوں ٻہوں سوہݨے اندار نال فن دے قالب اچ ڈھالے۔ انہاں آکھیا جو اے کم اعلیٰ معیار دا حامل اے تے عالمی سطح تے پیش کیتے ونڄݨ آلے بہترین فن پاریں دے ہم پلہ اے۔ وفاقی وزیر آکھیا جو ایں کم اچوں کجھ فن پاریں کوں محفوظ رکھݨ دے نال انہاں کوں ٻاہرلے ملک نمائشاں کیتے وی پیش کیتا ویسی تاں جو دنیا کوں علامہ اقبال دے فکر و پیغام نال ہک منفرد تے موثر انداز اچ روشناس کروایا ونڄ سڳے۔ ایں موقع تے لوک ورثہ دے ایگزیکٹو ڈائریکٹر ڈاکٹر محمد وقاص سلیم ابتدائی کلمات اچ نمائش دے انعقاد تے خوشی دا اظہار کریندے آکھیا جو اے نمائش علامہ اقبال دے افکار تے تصورات دا فنکارانہ عکس اے۔ انہاں آکھیا جو ایں نمائش دا بنیادی مقصد اقبال دے پیغام کوں زیادہ توں زیادہ لوکاں تئیں پڄاوݨا اے۔ معروف فنکارہ گیتی آراء نمائش دے اغراض و مقاصد تے ایں منفرد فنکارانہ منصوبے کوں مکمل کرݨ کیتے طے کیتے ڳئے اپݨے تخلیقی سفر تے روشنی پاتی۔