پاکستان زراعت دے شعبے اچ پرتگال نال تعاون ودھاوݨ ،تحقیق تے ٹیکنالوجی دی منتقلی اچ دلچسپی رکھیندے، رانا تنویر حسین

اسلام آباد۔ 10 ستمبر(اے پی پی) وفاقی وزیرقومی غذائی تحفظ و تحقیق رانا تنویر حسین آکھیے جو پاکستان زراعت دے شعبے اچ پرتگال دے نال تعاون کوں ٻیا ودھاوݨ بالخصوص زیتون دی کاشت، زیتون دے تیل دی پیداوار، تحقیق تے ٹیکنالوجی دی منتقلی اچ دلچسپی رکھیندے۔ اے ڳالھ انہاں پرتگال دے سفیر پاؤلو میگوئل گویڈیز ڈومنگیوز دے نال اعلیٰ سطح دے اجلاس دی صدارت کریندے آکھی جیندے اچ ݙوہیں ملکاں وچال ݙوطرفہ تعاون بالخصوص پاکستان دے زیتون دے شعبے دی ترقی متعلق امور تےڳالھ مہاڑ کیتی ڳئی ۔ وزارتِ قومی غذائی تحفظ و تحقیق دے اعلامیے موجب ایں موقع تے وفاقی وزیر رانا تنویر حسین پرتگال دے اپݨے اڄوکے دورے کوں ٻہوں کامیاب قرار ݙیندے پرتگال دے زیتون دے تیل دے شعبے اچ جدید مشینری، ٹیکنالوجی تے فنی مہارت دی تعریف کیتی ۔ انہاں آکھیا جو پاکستان زیتون دے جرثومہ جاتی ذخیرے (Germplasm)، جدید باغات دے انتظام، موثر آبپاشی، مشینی طریقے نال زیتون دی برداشت، زیتون دے تیل دے اخراج تے بعد از برداشت پراسیسنگ دے شعبیں اچ پرتگال دے نال تعاون چاہندے۔رانا تنویر حسین آکھیا جو پاکستان اپݨے تکنیکی ماہرین کوں خصوصی تربیت کیتے پرتگال بھیجݨا چاہندے ڄݙاں جو پرتگالی ماہرین کوں وی پاکستان دا دورہ کرݨا چاہیدے تاں جو او مقامی حالات دا جائزہ گھن تے موزوں ٹیکنالوجیز تے جدید طریقہ کار دیاں سفارشات پیش کر سڳن۔ انہاں آکھیا جو پاکستان پرتگال دے وزیرِ زراعت دے متوقع دورہِ پاکستان دا منتظر اے، جیں دوران زرعی تعاون اچ مزید پیش رفت تے ممکنہ مفاہمت دی یادداشت (ایم او یو) تے غور وی متوقع اے۔ وفاقی وزیر زیتون دے شعبے اچ تعاون کیتے پاکستان۔پرتگال مشترکہ ورکنگ گروپ قائم کرݨ دی تجویز وی پیش کیتی، ڄہڑا ترجیحی شعبیں دی سنڄاݨ، ماہرین دے تبادلیں، مشترکہ تحقیق و تربیتی پروگراماں دے ودھارے تے زیتون دی مکمل ویلیو چین اچ سرمایہ کاری و مشترکہ منصوبیں کیتے سہولت کاری کریسی۔