سارے نان ٹیرف اقدامات دا جامع آڈٹ کیتا ونڄے، تجارت دے رستے اچ آندیاں غیر ضروری رکاوٹاں مکائیاں ونڄن ، وزیرِاعظم محمد شہباز شریف دی ٹریڈ فیسیلیٹیشن بورڈ دے اجلاس اچ ہدایت

اسلام آباد۔ 10 ستمبر(اے پی پی) وزیرِاعظم محمد شہباز شریف ہدایت کیتی اے جو سارے نان ٹیرف اقدامات دا جامع آڈٹ کیتا ونڄے تے تجارت دے رستے اچ آندی غیر ضروری رکاوٹاں مکائیاں ونڄن، وزیرِ اعظم ساری بندرگاہواں کیتے ٹائم ریلیز آٹومیٹڈ سسٹم دے مقررہ اہداف، نان ٹیرف اقدامات دے جائزے کیتے ورکنگ گروپ دی منظوری ݙے ݙتی۔ وزیرِاعظم دفتر دے میڈیا ونگ توں جاری بیان موجب وزیرِاعظم محمد شہباز شریف دی زیرِ صدارت ٹریڈ فیسیلیٹیشن بورڈ دا پہلا اجلاس منعقد تھیا۔ اجلاس کوں ساری بندرگاہواں کیتے ٹائم ریلیز آٹومیٹڈ سسٹم دے اہداف دا ݙسائے۔اجلاس کوں بریفنگ اچ ݙسایا ڳئے جو اڄوکے مالی سال دے اختتام تئیں 30 فیصد پری ارائیول کلیئرنس دا ہدف مقرر کیتا ڳئے، اڄوکے مالی سال دے چھیکڑ تئیں گرین چینل دا حصہ 65 فیصد تئیں ودھاوݨ دا ہدف مقرر کیتا ڳئے، اڄوکے مالی سال دے چھیکڑ تئیں مجاز اقتصادی آپریٹرز دی تعداد 50 توں ودھ کرݨ دا ہدف مقرر کیتا ڳئے۔ ایں موقع تے ڳالھ کریندے وزیرِاعظم آکھیا جو حکومت تجارتی برادری کوں ہر ممکن سہولت ݙیوݨ کیتے پرعزم اے ، تجارت دے ودھارے تے کاروباری سرگرمیاں اچ سوکھ ݙیوݨ حکومت دیاں اولین ترجیحات اچ شامل اے، تجارتی عمل اچ غیر ضروری تاخیر دا خاتمہ، کاروباری لاڳت اچ کمی تے برآمدات دے ودھارے کیتے موثر اقدامات ڳھدے ونڄن، تجارت اچ سہولت کاری دے ذریعے پاکستان کوں علاقائی تے عالمی سپلائی چینز دا موثر حصہ بݨاوݨ کیتے حکومت پرعزم اے۔ انہاں آکھیا جو ٹریڈ فسیلیٹیشن بورڈ دا بنیادی مقصد تجارت متعلق سارے طریقہ کار اچ آندیاں رکاوٹاں کوں مکاوݨا اے ، زیادہ حجم رکھݨ آلیاں بندرگاہواں تے سارے متعلقہ ادارے تجارتی برادری کوں ہکی جاہ تے سہولتاں ݙیوݨ ،مختلف اداریں دی سانجھی انسپیکشن تے مشترکہ پروفائلنگ دے نظام کوں ودھارا ݙتا ونڄے۔ وزیرِاعظم ہدایت کیتی جو سارے نان ٹیرف اقدامات دا جامع آڈٹ کیتا ونڄے تے تجارت دے رستے اچ آندیاں غیر ضروری رکاوٹاں دور کیتیاں ونڄن۔ انہاں آکھیا جو پاکستانی بندرگاہواں تئیں براہِ راست شپنگ لائنز گھن آوݨ کیتے موثر اقدامات ڳھدے ونڄن، براہِ راست شپنگ سہولت نال پاکستانی فیکٹریاں توں عالمی خریداراں تئیں مصنوعات دی ترسیل ٻئی سوکھی تے تکھی تھیسی۔ وزیرِاعظم قومی تجارتی کارکردگی انڈیکس تیار کرݨ دی وی ہدایت کیتی۔ قومی تجارتی کارکردگی انڈیکس اچ کارگو ڈویل ٹائم، کسٹمز کلیئرنس، لاجسٹکس، شپ کلیئرنس ٹائم، پوسٹ کلیئرنس آڈٹ تے پری کلیئرنس سودھے ٻئے اہم اشاریں دی پیمائش کیتی ویسی۔ انہاں تجارت اچ چھوٹے تے درمیانے درجے دے کاروباری اداریں دا حصہ ودھاوݨ کیتے خصوصی اقدامات گھنݨ دی ہدایت وی کیتی تے آکھیا جو ایس ایم ایز دے تجارتی سفر دے مختلف مرحلیں دی میپنگ دے ذریعے انہاں کوں درپیش رکاوٹاں دی نشاندہی کیتی ونڄے، تجارت اچ سہولت کیتے رسک مینجمنٹ نظام کوں ٻیا موثر بݨایا ونڄے، کارگو کلیئرنس دے عمل کوں تکھا کرݨ کیتے کنٹرولز کوں پری ارائیول توں پوسٹ ریلیز مرحلے تئیں وسعت ݙتی ونڄے، صرف ہائی رسک کارگو دی تفصیلی جانچ پڑتال کیتی ونڄے۔ انہاں آکھیا جو رسک مینجمنٹ کوں ٻیا موثر بݨاوݨ تے تجارتی عمل تکھا کرݨ کیتے مصنوعی ذہانت توں فیدہ حاصل کیتا ونڄے۔ وزیرِاعظم محمد شہباز شریف ساری بندرگاہواں کیتے ٹائم ریلیز آٹومیٹڈ سسٹم دے مقررہ اہداف دی منظوری ݙے ݙتی۔ وزیرِاعظم نان ٹیرف اقدامات دے جائزے کیتے ورکنگ گروپ دی وی منظوری ݙتی تے ہدایت ݙتی جو اے ورکنگ گروپ غیر ضروری قواعد دے خاتمے تے تجارت اچ سوکھ پیدا کرݨ کیتے ہک مہینے دے اندر روڈ میپ پیش کرے۔ اجلاس اچ وفاقی وزراء رانا تنویر حسین، اعظم نذیر تارڑ، جنید انوار چوہدری، مشیر وزیرِاعظم ہارون اختر خان، وزیرِ مملکت بلال اظہر کیانی تے ٹریڈ فیسیلیٹیشن بورڈ دے ممبران شرکت کیتی۔