وزیرِ اعظم شہباز شریف دا لائیو سٹاک دے شعبے دی ترقی، زرعی برآمدات دے فروغ کیتے وفاق تے صوبیاں وچال موثر رابطہ تے شراکت داری دی ضرورت تے زور

اسلام آباد۔ 11 ستمبر (اے پی پی) وزیرِ اعظم شہباز شریف فی ایکڑ زرعی پیداوار اچ اضافے، زراعت اچ جدت گھن آوݨ، لائیو سٹاک دے شعبے دی ترقی تے زرعی برآمدات دے فروغ کیتے وفاق تے صوبیاں دے درمیان موثر رابطہ تے شراکت داری دی ضرورت تے زور ݙیندیں ہوئیں آکھیا جو پاکستان دی زرعی مصنوعات کیتے عالمی منڈیاں اچ رسائی ودھاوݨ تے نویاں منڈیاں تلاش کرݨ کیتے مربوط اقدامات کیتے ونڄن۔ وزیرِ اعظم آفس دے پریس ونگ توں جاری بیان دے مطابق وزیرِ اعظم محمد شہباز شریف دی صدارت زرعی شعبے تے زرعی برآمدات دے فروغ دے حوالے نال اعلیٰ سطحی اجلاس تھیا۔ اجلاس نال خطاب کریندیں ہوئیں وزیرِ اعظم آکھیا جو زرعی شعبے دا پاکستان دی معیشت دی ترقی تے استحکام اچ کلیدی کردار اے، فی ایکڑ زرعی پیداوار اچ اضافے، زراعت اچ جدت گھن آوݨ، لائیو سٹاک دے شعبے دی ترقی تے زرعی برآمدات دے فروغ کیتے وفاق تے صوبیاں دے درمیان موثر رابطہ تے شراکت داری ضروری ہے۔ وزیرِ اعظم زرعی برآمدات دے فروغ کیتے پاکستان دے بیرونِ ملک مشنز اچ تعینات کمرشل افسراں کوں موثر کردار ادا کرݨ دی ہدایت کیتی۔ وزیرِ اعظم کساناں کوں فصلاں دی نگرانی کیتے دستیاب موبائل ایپ دے حوالے نال آگاہی ودھاوݨ کیتے موثر میڈیا مہم چلاوݨ دی وی ہدایت کیتی۔ انہاں آکھیا جو زرعی شعبے دی برآمدات ودھاوݨ کیتے زرعی مصنوعات اچ ویلیو ایڈیشن ضروری اے۔ اجلاس اچ زرعی شعبے دے فروغ تے زرعی برآمدات ودھاوݨ کیتے تجاویز پیش کیتیاں ڳیاں۔اجلاس کوں بریفنگ اچ ݙسایا ڳیا جو گزشتہ مالی سال اچ پاکستان دے زرعی شعبے توں برآمدات 5.18 ارب ڈالر رہیاں۔ چاول، فشریز، حلال گوشت، آلو، تل، تمباکو، امٻ تے مکئی پاکستان دی نمایاں زرعی برآمدات رہیاں۔ اجلاس اچ زرعی برآمدات اچ اضافے کیتے ویلیو چینز تشکیل ݙیوݨ دی تجویز ݙتی ڳئی اتے ݙسایا ڳیا جو چین، سعودی عرب، ایران تے خلیجی ملک پاکستان دی زراعت برآمدات دے حوالے نال اہم ملک ہن۔ نیشنل ایگریکلچر اینڈ فوڈ سکیورٹی کونسل کوں فعال کیتا ویسی۔ اجلاس کوں ݙسایا ڳیا جو نیشنل ایگریکلچر اینڈ فوڈ سکیورٹی کونسل اچ وزرائے اعلیٰ آپݨے آپݨے صوبیاں دی نمائندگی کریسن۔ اجلاس اچ ڈیجیٹل فارمرز ڈائری-ایگری سٹیک دی تشکیل دی تجویز وی ݙتی ڳئی ڄیندے تحت ملک بھر دے کساناں تے زرعی لینڈ ریکارڈز کوں ڈیجیٹائز کیتا ویسی۔ ڈیجیٹل فارمرز ڈائری-ایگری سٹیک دے تحت زمین تے پاݨی دی جانچ دے ریکارڈ ڈیجیٹائز کیتے ویسن، بہتر نتائج رکھݨ آلے زرعی طریقہ کاراں دے فروغ کیتے پاک-گیپ (Pakistan-Good Agriculture Practices) نظام تشکیل ݙتا ویسی۔ بریفنگ اچ ٻیا ݙسایا ڳیا جو زرعی شعبے دے برآمد کنندگاں دے فروغ کیتے زرعی فنانسنگ دے حوالے نال سہولیات فراہم کیتی ویسن۔ اجلاس اچ وفاقی وزیرِ منصوبہ بندی احسن اقبال، وفاقی وزیرِ قومی غذائی تحفظ رانا تنویر حسین، وفاقی وزیرِ اقتصادی امور احد خان چیمہ، وفاقی وزیرِ موسمیاتی تبدیلی مصدق ملک، وفاقی وزیرِ تجارت جام کمال خان، وفاقی وزیرِ اطلاعات تے نشریات عطاء اللہ تارڑ، وفاقی وزیرِ انفارمیشن ٹیکنالوجی تے ٹیلی کام شزا فاطمہ، مشیر برائے صنعت تے پیداوار ہارون اختر، وزیرِ مملکت برائے خزانہ تے ریلوے بلال اظہر کیانی، وزیرِ مملکت برائے قومی غذائی تحفظ ملک رشید احمد تے متعلقہ اعلیٰ سرکاری افسراں شرکت کیتی۔