وزیرِ اعظم دا ملک دے مختلف علاقیاں اچ بجلی دی لوڈ شیڈنگ دا نوٹس، کہیں وی علاقے اچ ݙو گھنٹیاں توں ودھ لوڈ شیڈنگ نہ کیتی ونڄے، شہباز شریف

اسلام آباد۔ 11 ستمبر (اے پی پی) وزیرِ اعظم محمد شہباز شریف ملک دے مختلف علاقیاں اچ بجلی دی لوڈ شیڈنگ دا نوٹس گھندیں ہوئیں مختلف شہراں اچ بجلی دی ودھدی ہوئی لوڈ شیڈنگ تے کاوڑ کیتی اے۔ جمعے کوں وزیرِ اعظم آفس دے میڈیا ونگ توں جاری بیان دے مطابق وزیرِ اعظم محمد شہباز شریف دی صدارت ملک اچ بجلی دی لوڈ مینجمنٹ تے اہم جائزہ اجلاس تھیا۔اجلاس کوں ݙسیا ڳیا جو خطے دی اڄوکی صورتحال تے آبنائے ہرمز اچ کشیدگی تے ترسیلی مشکلاں دے باعث آر ایل این جی دی فراہمی متاثر تھیوݨ نال بجلی دی پیداوار اچ ڳھٹکی تھئی اے ڄیندے نتیجے اچ طلب تے رسد اچ توازن برقرار رکھݨ کیتے مجبوراً لوڈ مینجمنٹ کرݨی پوندی پئی اے۔ اجلاس کوں ݙسایا ڳیا جو ہیلپ لائن نمبر 118 دے ذریعے بجلی صارفین آپݨی شکایتاں درج کروا سڳدن، شکایت درج کرواوݨ تے صارف کوں ٹوکن نمبر تے شکایت دے ازالے دا ویلھا وی ݙسایا ویندے۔ اجلاس کوں آگاہ کیتا ڳیا جو ایں ویلھے ماسوائے ضلع راجن پور دے 6 بجلی صارفین دے ملک بھر دے کہیں صارف دی بجلی مون سون بارشاں دی وجہ توں متاثر نئی۔ ایں موقع تے ڳالھ مہاڑ کریندیں ہوئیں وزیرِ اعظم آکھیا جو کہیں وی علاقے اچ ݙو گھنٹیاں توں ودھ لوڈ شیڈنگ نہ کیتی ونڄے۔ وزیرِ اعظم ہدایت کیتی جو خطے دی صورتحال تے مستقبل دی ضرورتاں کوں ݙیکھدیں ہوئیں آر ایل این جی دی ترسیل اچ تعطل نال نبڑݨ کیتے فوری اقدامات کیتے ونڄن، تمام موجود وسائل دا موثر استعمال کیتا ونڄے تانجو کہیں علاقے اچ ݙو گھنٹیاں توں ودھ بجلی دی لوڈ شیڈنگ نہ تھیوے۔ انہاں ملک بھر اچ بجلی دی ترسیل تے ٻئے تمام مسئلیاں بارے عوامی شکایتاں دے ازالے کیتے ڈسکوز دی سطح تے صارفین دی شکایتاں دے ازالے کیتے کمیٹیاں قائم کرݨ دے احکامات ݙتے اتے ہدایت کیتی جو ازالہ کمیٹی اچ عوامی نمائندگی وی تھیوݨی چاہیدی اے، ہک ہفتے دے اندر انہاں کمیٹیاں کوں فعال کیتا ونڄے۔ اجلاس اچ وفاقی وزیرِ منصوبہ بندی احسن اقبال، اقتصادی امور احد خان چیمہ، وفاقی وزیرِ موسمیاتی تبدیلی مصدق ملک، وفاقی وزیرِ اطلاعات تے نشریات عطاء اللہ تارڑ، وزیرِ پٹرولیم علی پرویز ملک، وفاقی وزیرِ پاور ڈویژن سردار اویس لغاری، مشیر وزیرِ اعظم رانا ثناء اللہ، وزیرِ مملکت برائے خزانہ تے ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔