پاکستان اچ عالمی بحری قوانین تے عمل درآمد جاری اے، جنید انوار چوہدری

اسلام آباد۔24 ستمبر (اے پی پی) وفاقی وزیربحری امور محمد جنید انوار چوہدری آکھیے جو پاکستان بحری شعبے تے ایں نال متعلق آپریشنز اچ بین الاقوامی بحری قوانین تے معیارات تے عمل درآمد کریندا پئے، انہاں قوانین تے موثر عمل درآمد کیتے قانون سازی، نفاذ، تربیت تے استعداد کار اچ ودھارے دی لوڑھ اے ۔ ورلڈ میری ٹائم ڈے دے موقع تے اپݨے پیغام اچ وفاقی وزیر آکھیا جو 2026 دا موضوع ’’پالیسی توں عمل درآمد تئیں: بحری شعبے اچ بہترین کارکردگی دا ودھارا ‘‘ بحری پالیسیاں تے بین الاقوامی معیارات کوں عملی اقدامات اچ تبدیل کرݨ دی اہمیت کوں اجاگر کریندے۔جنید انوار چوہدری آکھیے جو بحری معیارات تے عمل درآمد کیتے متعلقہ حکومتی اداریں، ریگولیٹرز، بندرگاہواں، شپنگ کمپنیاں تے ٻئے سٹیک ہولڈرز دے وچال موثر رابطہ تے تعاون ضروری اے۔ انہاں آکھیا جو بحری شعبے اچ تربیت تے تکنیکی تعاون خصوصی اہمیت رکھدن تاں جو بحری جہازاں تے خدمات انجام ݙیوݨ آلے لوکاں تے ٻئے بحری شعبے دے ماہرین دی پیشہ ورانہ صلاحیتیاں کوں بہتر بݨایا ونڄ سڳے تے آپریشنل معیارات برقرار رکھیے ونڄ سڳن۔وفاقی وزیر آکھیا جو بحری تعلیم دے ودھارے کیتے میری ٹائم ایجوکیشن انڈومنٹ فنڈ قائم کیتا ڳئے جیندے کیتے ھک ارب 20 کروڑ روپے دی ابتدائی رقم مختص کیتی ڳئی اے۔ انہاں ݙسایا جو پاکستان میرین اکیڈمی کوں ڈگری جاری کرݨ آلے ادارے دی حیثیت نال اپ گریڈ کیتا ویندا پئے تاں جو بحری شعبے اچ تربیت تے پیشہ ورانہ مہارت کوں مزید بہتر بݨایا ونڄ سڳے