مالدیپ دے پارلیمانی وفد دا پاکستان انسٹی ٹیوٹ فار پارلیمنٹری سروسز دا دورہ

اسلام آباد۔24 ستمبر (اے پی پی) وفاقی وزیرِ قانون و انصاف سینیٹر اعظم نذیر تارڑ آکھیے جو آئین ریاست دے اندر مقننہ، انتظامیہ تے عدلیہ دے اختیارات دی ونڈ دا اصول وضع کریندے جݙاں جو پارلیمانی نگرانی تے اداریں وچال اختیارات دا توازن جمہوری نظام دا اہم حصہ اے ۔ترجمان وزارتِ قانون و انصاف موجب او پاکستان انسٹی ٹیوٹ فار پارلیمنٹری سروسز دے دورے دے موقع تے مالدیپ دے پارلیمانی وفد نال خطاب کریندے پئے ہن۔ مالدیپ دے وفد دے دورے دے دوران پارلیمانی تجربیں تے معلومات دے تبادلے دے پروگرام دے تحت خصوصی سیشن دا انعقاد کیتا ڳیا۔وفاقی وزیرِ قانون مالدیپ دے پارلیمانی وفد کوں پاکستان دے پارلیمانی نظام دے مختلف پہلواں تے بریفنگ ݙتی۔ انہاں قومی اسمبلی تے سینیٹ دی کارروائی، قانون سازی دے مختلف مرحلے تے قائمہ کمیٹیاں دے کردار دا وفد کوں ݙسایا۔ سینیٹراعظم نذیر تارڑ آکھیا جو پاکستان دا آئینی نظام ریاستی اداریں وچال اختیارات دی ونڈ تے توازن دے اصول تے قائم اے۔ انہاں پارلیمانی نگرانی دی اہمیت تے قانون سازی دے عمل اچ پارلیمانی کمیٹیاں دے کردار تے وی روشنی پاتی۔وفاقی وزیرِ قانون مالدیپ دے وفد کوں پاکستان کوڈ ویب سائٹ تے موبائل ایپ دے ذریعے آئین تے قوانین تئیں رسائی حاصل کرݨ دی دعوت ݙیندے ݙسایا جو پاکستان کوڈ وزارتِ قانون و انصاف دی طرفوں آئین سودھے ملک دے قوانین تئیں سوکھی رسائی کیتے تیار کیتے ڳئے پلیٹ فارم اے۔ مالدیپ دے پارلیمانی وفد پاکستان دے پارلیمانی تے قانون سازی دے طریقہ کار اچ گھاٹی دلچسپی دا اظہار کیتا۔ فریقین پاکستان تے مالدیپ وچال پارلیمانی تجربیں تے معلومات دے تبادلے دا سلسلہ جاری رکھݨ تے اتفاق کیتا۔