پمز اچ کھنڈی ترائے ایمرجنسیز کوں کٹھا کرتے نواں ٹراما سینٹر تعمیر کیتا ڳئے، وفاقی وزیرِ صحت مصطفیٰ کمال

اسلام آباد۔24 ستمبر (اے پی پی) وفاقی وزیرِ صحت مصطفیٰ کمال آکھیے جو ماضی اچ پمز اچ ترائے مختلف تے کھنڈیاں ہوئیاں ایمرجنسیز ہن، جنہاں کوں ھک جاہ منتقل کرتے نواں ٹراما سینٹر تعمیر کیتا ڳئے۔انہاں آکھیا جو پمز اچ ساڈھے 7 ارب روپے دی لاڳت نال نواں ٹراما سینٹر مکمل کیتا ڳئے۔ پمز اچ 10 ارب روپے دی لاڳت نال 205 بستریں تے مشتمل نواں کینسر ہسپتال وی تعمیر کیتا ویندا پئے۔ اے ڳالھ انہاں پمز ہسپتال اچ میڈیا نال الویندے آکھی ۔ وفاقی وزیرِ صحت آکھیا جو پمز اچ ایں توں پہلے کینسر دے مریضاں کیتے صرف 11 بستریں دی سہولت موجود ہئی، تاں جو نویں کینسر ہسپتال دی تکمیل نال ایں شعبے اچ نمایاں بہتری آسی۔انہاں ݙسایا جو پمز دی پراݨی عمارت دے حوالے نال 2018 توں ھک منصوبہ تیار ہئی، تاں جو پہلے پی سی ون تے بعد اچ ݙوجھے پی سی ون اچ خامیاں سامݨے آئیاں۔ کم شروع تھیوݨ دے بعد پی ڈبلیو ڈی بند تھی ڳیا، جیندے بعد سی ڈی اے عمارت دی تعمیر دا کم شروع کیتا۔ مصطفیٰ کمال آکھیا جو انہاں وفاقی وزیرِ داخلہ محسن نقوی نال رابطہ کر تے تعمیراتی کم تکھا کرایا۔انہاں ݙسایا جو مدر اینڈ چائلڈ ہیلتھ (ایم سی ایچ) سینٹر اچ مرمتی کم 15 نومبر تئیں مکمل تھی ویسے۔ پمز اچ نویں ہسپتالاں دی تعمیر سودھے مختلف ترقیاتی کم پہلے توں جاری ہن۔ وفاقی وزیرِ صحت آکھیا جو حکومت لیبارٹری دے حوالے نال ھک نجی کمپنی نال شراکت داری کرݨ ویندی پئی اے، جیندے تحت مریضاں دے ٹیسٹ بغیر اضافی رقم خرچ کیتے ویسن۔ انہاں آکھیا جو کوشش اے جو پمز آوݨ آلے مریضاں کوں ھک وی ٹیسٹ ٻاہروں نہ کراوݨا پووے۔مصطفیٰ کمال آکھیا جو ہیپاٹائٹس دا 7 ہزار روپے مالیت دا ٹیسٹ مفت کیتا ویندا پئے، جݙاں جو 34 ہزار روپے مالیت دی دوا وی مفت ݙتی ویندی پئی اے۔ انہاں ݙسایا جو ہیپاٹائٹس دے حوالے نال ہݨ تئیں 70 ہزار ٹیسٹ کیتے ونڄ چکئن، جݙاں جو نادرا نال وی معاہدہ موجود اے۔ وفاقی وزیرِ صحت عوام توں اپیل کیتی جو او مفت ہیپاٹائٹس ٹیسٹ دی سہولت توں فیدہ چاون۔ انہاں آکھیا جو ملک اچ ہیپاٹائٹس دے ھک کروڑ 10 لکھ مریض ہن تے اے بیماری جگر دے کینسر اچ تبدیل تھی سڳدی اے۔ انہاں آکھیا جو 12 سال توں ودھ عمر دے لوکاں کیتے ٹیسٹ لازمی قرار ݙتا ویسے تے عوام کوں مفت سہولت توں فیدہ چاوݨا چاہیدے۔وفاقی وزیرِ صحت آکھیا جو پاکستان کوں چلاوݨ تے بچاوݨ کیتے صوبے لازم و ملزوم ہن۔ وفاق اپݨی آمدݨ دا 57 فیصد صوبیں کوں ݙیندے جݙاں جو وفاق دے 8 ہزار 884 ارب روپے صوبیں کوں منتقل تھی ویندن۔ انہاں سوال چاتا جے وفاقی وسائل دا وݙا حصہ صوبیں کوں منتقل تھیندا پئے تاں کیا موجودہ نظام کوں ترقی قرار ݙتا ونڄ سڳدے؟ مصطفیٰ کمال آکھیا جو ملک دا پورا نظام اصلاحات دا متقاضی اے۔ انہاں آکھیا جو ملک دی 55 فیصد آبادی کوں صاف پاݨی میسر کائنی، جݙاں جو 2 کروڑ 60 لکھ لوکاں کوں پاݨی دی سہولت دستیاب کائنی۔ انہاں آکھیا جو گزریل 18 سالاں اچ 22 ہزار ارب روپے صوبیں کوں ݙتے ڳئے، ایں دے باوجود بنیادی سہولیات دے مسئلے موجود ہن۔وفاقی وزیرِ صحت آکھیا جو ہݨ ضروری اے جو اختیارات دا موثر استعمال کیتا ونڄے۔ انہاں آکھیا جو چارے صوبیں کوں انڄ انڄ اکائیاں دے بجائے قومی نظام دا حصہ سمجھ تے اڳوں ودھݨا ہوسی۔ انہاں سندھ دی صورتحال دا حوالہ ݙیندے آکھیا جو حیدرآباد اچ ٻال مردے پئن تے لوک پاݨی حاصل کرݨ کیتے 12، 12 کلومیٹر پرے ویندے پئن، مگر ایں صورتحال تے مطلوبہ ردِعمل سامݨے نی آندا پیا۔ وفاقی وزیرِ صحت مصطفیٰ کمال 27 ستمبر دے حوالے نال آکھیا جو انہاں دی دعا اے جو اللہ رحم فرماوے۔ انہاں آکھیا جو پولیس اہلکار تے مظاہرین وی کہیں دے ٻال ہن۔ انہاں آکھیا جو وزیراعظم دی وطن واپسی دے بعد انہاں کوں اصلاحات دے حوالے نال بریفنگ ݙتی ویسے۔