وزیراعظم محمد شہبازشریف دی یو این سیکرٹری جنرل نال ملاقات، اقوام متحدہ دے کردار کوں اجاگر کریندے ایں دے منشور دے مقصد تے اصولاں نال پاکستان دی وابستگی دا اعادہ کیتا

نیویارک۔25 ستمبر(اے پی پی)وزیراعظم محمد شہباز شریف کثیرالجہتی نظام کیتے پاکستان دے پختہ عزم تے عالمی امن و ترقی دے ودھارے اچ اقوام متحدہ دے مرکزی کردار کوں اجاگر کریندے ایں دے منشور دے مقصد تے اصولاں نال پاکستان دی مضبوط وابستگی دا اعادہ تے علاقائی کشیدگی مکاوݨ کیتے مکالمے تے سفارت کاری دی اہمیت تے زور ݙتے۔وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی اقوام متحدہ دی جنرل اسمبلی دے 81ویں اجلاس دے موقع تے یو این سیکرٹری جنرل انتونیو گوتریش نال ملاقات تھئی جئیں دوران انہاں کثیرالجہتی نظام کیتے پاکستان دے پختہ عزم تے عالمی امن و ترقی دے ودھارے اچ اقوام متحدہ دے مرکزی کردار دی اہمیت کوں اجاگر کریندے ایں دے منشور دے مقصد تے اصولاں نال پاکستان دی مضبوط وابستگی دا اعادہ کیتا۔ انہاں سیکرٹری جنرل انتونیو گوتریش دی قیادت دی تعریف کریندے انسانیت دی بہتری کیتے اقوام متحدہ دے سارے شعبیں اچ یو این منشور دی پاسداری دے حوالے نال انہاں دے اصولی کردار کوں خراجِ تحسین پیش کیتا۔ݙوہیں رہنماواں مشرقِ وسطیٰ دی صورتحال سودھے اہم علاقائی تے عالمی امور تے ڳالھ کیتی۔ وزیراعظم علاقائی کشیدگی دے حل کیتے مکالمے تے سفارت کاری دی اہمیت تے زور ݙیندے خطے اچ امن و استحکام دے ودھارے کیتے پاکستان دے عزم دا اعادہ کیتا۔ انہاں فلسطینی عوام دے حقِ خودارادیت تے آزاد ریاست دے قیام دے حق کیتے وی پاکستان دی حمایت دا اعادہ کیتا۔ وزیراعظم سیکرٹری جنرل کوں اسلاموفوبیا دے ودھدے رجحان بالخصوص پاکستان دے نیڑے ہمسایہ خطے اچ ایں دے ودھدے واقعات دا ݙسیندے ایں رجحان کوں روکݨ کیتے موثر عالمی اقدامات دی لوڑھ تے زور ݙتا۔ݙوہیں رہنماواں افغانستان دی صورتحال تے افغان سرزمین توں تھیوݨ آلی دہشتگردی اچ تھیوݨ آلے تشویشناک ودھارے تے وی ڳالھ کیتی۔ سیکرٹری جنرل انتونیو گوتریش اقوام متحدہ اچ پاکستان دے قائدانہ کردار تے موثر آواز، عالمی امن و سلامتی کیتے خدمات بالخصوص جھیڑے دے پرامن حل تے خطے اچ پائیدار امن و استحکام کیتے پاکستان دی اہم سفارتی تے ثالثی کوششاں دی تعریف کیتی ۔انہاں دہشتگردی دے خلاف جنگ اچ پاکستان دے کردار تے ایں ضمن اچ ݙتیاں ونڄݨ آلیاں قربانیاں دی وی تعریف کیتی۔