بھارت دا ہک ٻیا فالس فلیگ آپریشن بے نقاب: مقبوضہ کشمیر اچ نام نہاد مقابلے اچ ”شہید“ قرار ݙتا ڳیا ایس ایس جی دا ریٹائرڈ حوالدار محمد آصف میڈیا دے سامݨے پیش، بھارت دہشتگردی دا سبھ توں وݙا سرپرست اتے ”انکاؤنٹرستان“ ٻݨ چکیے: ڈی جی آئی ایس پی آر

راولپنڈی۔1 اکتوبر(اے پی پی)پاکستان بھارتی فوج ولوں مقبوضہ جموں و کشمیر اچ نام نہاد مقابلے اچ پاک فوج دے سابق اہلکار کوں مارݨ دے کوڑے اتے من گھڑت دعوے کوں مکمل طور تے بے نقاب کریندے فالس فلیگ آپریشن دا پول کھول ݙتے۔ پاک فوج دے شعبہ تعلقاتِ عامہ (آئی ایس پی آر) بھارتی پراپیگنڈے دے برعکس زندہ و سلامت ریٹائرڈ حوالدار محمد آصف کوں ملکی و بین الاقوامی میڈیا دے سامݨے پیش کر تے نویں دہلی دے مضحکہ خیز دعویاں دی قلعی کھول ݙتی۔ جی ایچ کیو راولپنڈی اچ ہک اہم پریس کانفرنس کریندے ہوئیں ڈائریکٹر جنرل آئی ایس پی آر لیفٹیننٹ جنرل احمد شریف چوہدری ݙسایا جو 29 ستمبر کوں بھارتی فوج ہک ٻئے فالس فلیگ آپریشن دا ڈراما رچایا۔ 29 ستمبر دی رات بھارتی فوج دی کور سوشل میڈیا اتے پوسٹ دے ذریعے دعویٰ کیتا جو مقبوضہ کشمیر اچ ہک آپریشن اچ کالعدم تنظیم نال جڑیے دہشتگرد محمد آصف عرف ہاشم موسیٰ کوں ہلاک کر تے لاش برآمد کر ڳھدی اے۔ ڈی جی آئی ایس پی آر آکھیا جو بعد اچ بھارتی فوج نواں من گھڑت دعویٰ کریندے ہوئیں آکھیا جو ہلاک تھیوݨ والا شخص پاک فوج دے سپیشل سروسز گروپ (ایس ایس جی) دا ریٹائرڈ حوالدار محمد آصف اے، ڄݙاں جو بھارتی میڈیا سروس نمبر نال تفصیل جاری کریندے ایںدے تے پہلگام سودھا کئی حملیاں اچ ملوث تھیوݨ دا الزام وی لایا۔ انہاں آکھیا جو بھارتی دعویاں دے مطابق آصف کوں ہک اینڄھا ”سپرمین“ ٻݨا تے پیش کیتا ڳیا جیڑھا ہکے ویلھے درجناں کارروائیاں کریندا پیا ہئی، ٻھل حقیقت اے ہے جو او شخص ڄیندے بارے بھارت پراپیگنڈا کریندا پئے او جیندا جاغدا ساݙے نال موجود اے۔ ایں موقع تے ڈی جی آئی ایس پی آر ریٹائرڈ حوالدار محمد آصف کوں میڈیا دے سامݨے پیش کیتا۔ صحافیاں نال الیندے ہوئیں محمد آصف ݙسایا جو انہاں دا تعلق ضلع اٹک دی تحصیل پنڈی گھیب نال اے اتے او 2023ء اچ ایس ایس جی توں ریٹائرمنٹ دے بعد راولپنڈی اچ راہندن اتے ہک نجی سیکیورٹی کمپنی اچ ملازمت کریندے پئن۔ انہاں آکھیا، ”کل میکوں سنڳت اتے رشتہ داراں دے فون آئن جو بھارتی میڈیا میکوں مقبوضہ کشمیر اچ مارے ونڄݨ دی من گھڑت خبر چلائی اے۔ میں اپݨے گھر اچ صحیح سلامت موجود ہاں، بھارت دے ایں چٹے کوڑ، بے بنیاد اتے من گھڑت الزاماں دی شدید مذمت کرینداں۔“ انہاں آکھیا جو او اڳیں آلی کار اڳو تے وی مادرِ وطن دے دفاع کیتے ہر ویلھے تیار ہاں۔ لیفٹیننٹ جنرل احمد شریف چوہدری آکھیا جو بھارت دنیا اچ ریاستی دہشتگردی کھنݙاوݨ والا سبھ توں وݙا ملک اے اتے اڄ دا ہندوستان ”انکاؤنٹرستان“ ٻݨ چکیے۔ مکتی باہنی توں گھن تے فتنۃ الخوارج (ٹی ٹی پی) اتے ٻئے دہشت گرد گروہاں دی بھارتی فنڈنگ اتے پشت پناہی کوئی لُکی ہوئی ڳالھ نئیں۔ انہاں آکھیا جو مقبوضہ جموں و کشمیر ایں ویلھے دنیا دی سبھ توں وݙی کھلی جیل اچ تبدیل تھی چکیے جتھاں 10 لکھ توں ودھ قابض بھارتی فوجی تعینات ہین اتے کشمیریاں کوں ہک ڄاہ توں ٻئی ڄاہ ونڄݨ کیتے وی اجازت نامے لوڑھ پوندن۔ بھارت مقبوضہ وادی اتے اپݨے ملک اچ اقلیتاں دے خلاف تھیوݨ والے ریاستی مظالم اتے جرائم تے پردہ پاوݨ کیتے پاکستان اتے محمد آصف جھئیں بے گناہ شہریاں تے الزام لیندا پئے۔ ڈی جی آئی ایس پی آر ݙو ٹوک الفاظ اچ واضح کیتا جو بھارتی فوج مکمل طور تے سیاسی تھی چکی اے اتے ہندوتوا دے ایجنڈے تے ٹردی پئی اے۔ انہاں چتاوݨی ݙتی جو پاکستان اپݨے جغرافیائی دفاع اتے خودمختاری تے کوئی سمجھوتہ نا کریسی، ڄیکر دشمن کہیں قسم دی جارحیت یا مہم جوئی دی کوشش کیتی تاں افواجِ پاکستان اتے پوری قوم ایںدا ݙاݙھا سخت اتے منہ توڑ جواب ݙیوݨ کیتے ہر ویلھے تیار ہین۔ ہک سوال دے ولدے اچ انہاں واضح کیتا جو حرمین شریفین دے تقدس اتے سعودی عرب دے دفاع و سلامتی دے حوالے نال پاکستان دا عزم پختہ تے غیر متزلزل اے۔ مکہ الائنس تے دفاعی معاہدیاں دے تحت باہمی تعاون ہک حساس اتے خفیہ معاملہ اے ڄیندی تفصیل میڈیا تے نئیں ڳھن آئی ونڄ سڳدی۔ داخلی سلامتی اتے آئینی امور تے انہاں آکھیا جو افواجِ پاکستان آئین دے تابع اتے ریاست دے احکامات دی پابند ہین اتے فوج دا ملکی سیاست نال کوئی تعلق نئیں۔ انہاں آکھیا جو ”ریاست اے تاں سیاست اے“، ملکی بقا اتے دہشت گردی دے خلاف جاری جنگ تے کوئی سیاسی سمجھوتہ نئیں کیتا ونڄ سڳدا۔ خیبرپختونخوا اتے بلوچستان اچ شہریاں دے جان و مال دے تحفظ کوں ہر قیمت تے یقینی بݨایا ویسی۔ انہاں آکھیا جو کالعدم ٹی ٹی پی اتے کالعدم بی ایل اے وچال کوئی فرق نئیں اتے ݙوہائیں دہشتگرد گروہاں کوں افغان سرزمین اتے اتھاں موجود عناصر دی سہولت کاری حاصل اے ڄیندے تدارک کیتے ریاست ہر ممکن قدم چیسی۔