سپیکر قومی اسمبلی سردار ایاز صادق دی صدارت اچ حکومت تے اپوزیشن ارکان وچال مذاکرات

اسلام آباد۔2 اکتوبر (اے پی پی) سپیکر قومی اسمبلی سردار ایاز صادق دی صدارت اچ حکومت تے اپوزیشن ارکان وچال مذاکرات پارلیمنٹ ہاؤس اچ تھئے۔ قومی اسمبلی سیکرٹریٹ موجب سپیکر قومی اسمبلی حکومت تے اپوزیشن دے ارکان دا سپیکر چیمبر اچ آوݨ تے خیرمقدم کیتا۔ انہاں آکھیا جو میں صرف ثالث دا کردار ادا کریندا پیاں، اللہ تعالیٰ توں دعا اے جو مذاکرات کامیابی نال ہمکنار تھیون، میݙا دفتر مسئلیں دے حل تے مذاکرات کیتے ہمیشہ کھلا اے، میں مسئلیں دے حل کیتے اپوزیشن کوں ہمیشہ مذاکرات دی دعوت ݙتی اے۔ سردار ایاز صادق آکھیا جو اختلافِ رائے تے مسئلیں دے حل دا واحد راستہ مذاکرات ہن، عہدے تے دفترعارضی ہوندن، پارلیمان ہی او واحد فورم اے جتھاں مسئلیں دا حل کڈھیا ونڄ سڳدے۔ اجلاس اچ وفاقی وزراء امیرمقام، رانا ثناء اللہ، محسن رضا نقوی، طارق فضل چوہدری تے وزیرِ مملکت طلال چوہدری، پیپلز پارٹی دی طرفوں سینیٹر شیری رحمان، ارکانِ قومی اسمبلی سید نوید قمر تے اعجاز حسین جاکھرانی جݙاں جو اپوزیشن رہنماؤاں اچ بیرسٹر گوہر خان، راجہ ناصر عباس، ملک عامر ڈوگر تے سابق سپیکر اسد قیصر دے علاوہ سلمان اکرم راجہ اجلاس اچ شرکت کیتی۔