وزیراعظم محمد شہباز شریف دی ہاؤسنگ، ایس ایم ایز تے زرعی شعبے اچ قرضیاں دی فراہمی کیتے بینکاں دی کوشساں دی پذیرائی

اسلام آباد۔9 اکتوبر (اے پی پی) وزیراعظم محمد شہباز شریف ہاؤسنگ، ایس ایم ایز تے زرعی شعبے اچ قرضیاں دی فراہمی کیتے بینکاں دی کوشساں کوں سراہندے ہوئیں آکھیا جو ایس ایم ایز، ہاؤسنگ تے زرعی شعبے اچ قرضیاں دی فراہمی اچ بہتری نال روزگار، سرمایہ کاری، پیداوار تے مجموعی معاشی ترقی کوں فروغ ملسی۔ وزیراعظم آفس دے میڈیا ونگ توں جاری بیان دے مطابق وزیراعظم شہباز شریف وزیراعظم آپݨا گھر پروگرام، چھوٹے تے درمیانے درجے دے کاروباری اداریاں تے زرعی شعبے کوں قرضیاں دی فراہمی اچ نمایاں تے بہترین کارکردگی ݙکھاوݨ آلے بینکاں دی کوشساں کوں سراہوݨ کیتے بینکاں دے صدور تے سی ای اوز دے وفد نال ملاقات کیتی تے وزیراعظم آپݨا گھر پروگرام، ایس ایم ایز تے زرعی شعبے اچ قرضیاں دی فراہمی کیتے بینکاں دی کوششاں کوں سراہیا۔ ایں موقع تے ڳالھ مہاڑ کریندیں ہوئیں وزیراعظم آکھیا جو چھوٹے و درمیانے درجے دے کاروباری ادارے پاکستان دی معیشت دی ریڑھ دی ہݙی ہن، انہاں دی ترقی نال روزگار دے نویں موقعے پیدا تھیسن اتے معاشی سرگرمیاں کوں فروغ ملسی، حکومت ولوں شروع کیتے ڳئے انہاں اقدامات دا مقصد عام شہریاں، کاروباری افراد تے کساناں کوں مالی وسائل تئیں رسائی فراہم کرݨا اے۔ انہاں آکھیا جو ایس ایم ایز، ہاؤسنگ تے زرعی شعبے اچ قرضیاں دی فراہمی اچ بہتری نال روزگار، سرمایہ کاری، پیداوار تے مجموعی معاشی ترقی کوں فروغ ملسی، قرضیاں دی فراہمی اچ حائل رکاوٹاں دور کرݨ تے ودھ توں ودھ شہریاں دے استفادے کیتے سٹیٹ بینک قرضیاں دی منظوری تے ادائیگی دے عمل کوں ٻیا سوکھا بݨاوے۔ وزیراعظم شہباز شریف آکھیا جو زرعی شعبے اچ قرضیاں دی فراہمی کساناں دی معاشی بہتری، زرعی پیداوار اچ اضافے تے غذائی تحفظ کیتے نہایت اہم اے، چھوٹے کساناں تئیں مالی وسائل دی رسائی کوں ترجیح ݙتی ون٘ڄے تانجو او جدید زرعی طریقے اپݨاوݨ تے آپݨی پیداواری صلاحیت ودھاوݨ دے قابل تھی سڳن۔ انہاں آکھیا جو زرعی فنانسنگ دے ذریعے چھوٹے کساناں تئیں رسائی ودھاوݨ ویلھے دی اہم لوڑھ اے، ملک دا وݙا بینک او اے جیڑھا چھوٹے کسان دا وی بینک ہووے۔ وفد وزیراعظم دی قیادت اچ پاکستان دے معاشی استحکام تے معیشت دی سمت دی بہتری تے وزیراعظم کوں خراجِ تحسین پیش کیتا تے حکومت دی معاشی پالیسیاں تے اعتماد دا اظہار کیتا۔ ایں موقع تے وفد دے ارکان آکھیا جو ترجیحی شعبہ جات اچ قرضے مہیا کرݨ کیتے حکومت دے نال بھرپور تعاون ٻیا بہتر بݨیندے پئیوں۔ وزیراعظم عوام کوں آپݨے گھر دا مالک بݨاوݨ، چھوٹے کاروباراں کوں مالی وسائل فراہم کرݨ تے کساناں دی پیداواری صلاحیت ودھاوݨ کیتے بینکاری شعبے دے تعاون تے شکریہ ادا کیتا۔ بریفنگ اچ ݙسایا ڳیا جو وزیراعظم آپݨا گھر پروگرام دے تحت ہݨ تئیں 426 ارب روپے دی مالیت دے قرضے منظور تھی ڳئن، انہاں اچوں 76 ارب روپے دے قرضے جاری کیتے ڳئن۔ مالی سال 2026-27ء کیتے ایں پروگرام دے تحت 125,000 رہائشی یونٹس دی تعمیر و فراہمی کیتے 700 ارب روپے دی فنانسنگ دا ہدف مقرر کیتا ڳئے۔ وزیراعظم ایں ڳالھ تے زور ݙتا جو قرضیاں دی منظوری تے رقوم دی فراہمی دے درمیان موجود فرق کوں گھٹ کیتا ون٘ڄے، کیونجو شہریاں کوں حقیقی فائدہ اوں ویلھے تھیسی جݙݨ منظور شدہ رقم انہاں تئیں ویلھے تے پڄسی۔ بریفنگ اچ ݙسایا ڳیا جو ڈویلپرز دی قرضیاں تئیں رسائی کیتے فریم ورک تے مشاورت جاری اے۔ اجلاس کوں ݙسایا ڳیا جو ایس ایم ای شعبے اچ تقریباً 350,862 کاروباری افراد کوں مجموعی طور تے 1,137 ارب روپے دے قرضے فراہم کیتے ڳئن۔ جون 2027ء تئیں قرضیاں دا حجم 1,500 ارب روپے تے مستفید تھیوݨ آلے کاروباری افراد دی تعداد 565,000 تئیں پڄاوݨ دا ہدف مقرر اے۔ اجلاس کوں ٻیا ݙسایا ڳیا جو ستمبر 2026ء دے اختتام تئیں زرعی قرضیاں دا مجموعی حجم 1,352 ارب روپے تئیں پڄ ڳئے جݙانجو 3,455,313 بندے ایں سہولت توں مستفید تھیندے پئن۔ جون 2027ء تئیں زرعی قرضیاں دا حجم 1,500 ارب روپے تے مستفید تھووݨ آلے کساناں دی تعداد 45 لکھ تئیں پڄاوݨ دا ہدف مقرر کیتا ڳئے۔ ملاقات اچ وفاقی وزراء احد خان چیمہ، محمد اورنگزیب، ریاض حسین پیرزادہ، عطاء اللہ تارڑ، وزیرِ مملکت بلال اظہر کیانی، گورنر سٹیٹ بینک جمیل احمد دے نال نال نیشنل بینک، یونائیٹڈ بینک، حبیب بینک، میزان بینک، بینک الفلاح، سٹینڈرڈ چارٹرڈ، بینک آف پنجاب، بینک اسلامی تے ہاؤس بلڈنگ فائنانس کارپوریشن دے صدور تے سی ای اوز دے نال متعلقہ اعلیٰ حکام وی شرکت کیتی۔