پاک افغان سرحد تے خوارج دی دراندازی ناکام، سکیورٹی فورسز دی کارروائی اچ 12 دہشت گرد تے افغان طالبان ہلاک، نائب صوبیدار شہید

راولپنڈی۔11 اکتوبر (اے پی پی) سکیورٹی فورسز ضلع کرم اچ پاک افغان بین الاقوامی سرحد تے اعلیٰ ترین چوکسی دا مظاہرہ کریندیں ہوئیں افغانستان توں خوارج دے ہک گراو دی دراندازی دی کوشش کوں موثر جوابی کارروائی دے ذریعے ناکام بݨا ݙتا، جیندے دوران افغان طالبان چوکیاں ولوں خوارج دی کھلی پشت پناہی تے فائرنگ دے باوجود 12 خوارج تے افغان طالبان ہلاک کر ݙتے ڳئے جݙانجو شدید فائرنگ دے تبادلے اچ بہادری نال لڑدیں ہوئیں پاک فوج دے نائب صوبیدار ہدایت امان جامِ شہادت نوش کیتا۔ پاک فوج دے شعبۂ تعلقاتِ عامہ (آئی ایس پی آر) دے مطابق گزریل ݙینھ ضلع کرم اچ پاک افغان بین الاقوامی سرحد دے نال خوارج دے ہک گراو دی نقل و حرکت دا سراغ لاتا ڳیا جیڑھا افغانستان توں پاکستان اچ داخل تھیوݨ دی کوشش کریندا پیا ہا، ایں کوں سکیورٹی فورسز موثر طریقے نال نشانہ بݨایا۔ سکیورٹی فورسز اعلیٰ ترین چوکسی تے مستعدی برقرار رکھیندے ہوئیں دراندازی دی ایں کوشش کوں موثر انداز اچ ناکام بݨا ݙتا جݙانجو افغان طالبان دی چوکیاں وی خوارج دی ایں دراندازی دی حمایت اچ فائرنگ شروع کر ݙتی۔ چوکس جواناں دی مہارت دے نتیجے اچ 12 خوارج تے افغان طالبان ہلاک تھی ڳئے جݙانجو شدید فائرنگ دے تبادلے دے دوران 40 سالہ نائب صوبیدار ہدایت امان جیڑھے ضلع غذر دے رہائشی ہن، بہادری نال لڑدے ہوئیں جامِ شہادت نوش کیتا۔ آئی ایس پی آر آکھیا جو پاک افغان سرحد تے پیش آوݨ آلا اے واقعہ ہک واری ولا پاکستان دے ایں مبنی بر حقیقت تے ٹھوس موقف دی تصدیق کریندیں جو افغان طالبان رجیم دہشت گرد تنظیم کوں افغان سرزمین دے استعمال توں روکݨ اچ جاݨ ٻجھ تے مکمل ناکام رہی اے بلکہ او سرحد پار دہشت گردی دی سہولت کاری تے سرپرستی کریندی پئی اے۔ افغان طالبان رجیم انسدادِ دہشت گردی نال متعلق آپݨی بین الاقوامی ذمہ داریاں کوں نبھاوݨ اچ مسلسل ناکام رہی اے۔اساݙے بہادر جواناں دیاں اے قربانیاں ہر قیمت تے آپݨے وطن تے ایں دی سرحداں دے تحفظ دے غیر متزلزل عزم کوں ٻیا مضبوط بݨیندیاں ہن۔