صدرِ مملکت آصف علی زرداری دا پاک افغان سرحد تے دہشت گرداں دی دراندازی دی کوشش ناکام بݨاوݨ تے سکیورٹی فورسز کوں خراجِ تحسین

اسلام آباد۔11 اکتوبر (اے پی پی) صدرِ مملکت آصف علی زرداری خیبر پختونخوا دے ضلع کرم اچ پاک افغان سرحد تے دہشت گرداں دی دراندازی دی کوشش ناکام بݨاوݨ تے سکیورٹی فورسز کوں خراجِ تحسین پیش کیتے۔ اتوار کوں ایوانِ صدر دے پریس ونگ توں جاری بیان دے مطابق صدرِ مملکت دہشت گرداں دی دراندازی دی کوشش کوں ناکام بݨاوݨ دے دوران نائب صوبیدار ہدایت امان دی شہادت تے ݙکھ تے افسوس دا اظہار کیتا اتے انہاں کوں وطن دے دفاع اچ جان دا نذرانہ پیش کرݨ تے بھرپور خراجِ عقیدت پیش کیتا۔ صدرِ مملکت شہید دے اہل خانہ نال دلی تعزیت تے اظہارِ ہمدردی کیتا تے شہید دے درجات دی بلندی تے لواحقین کیتے صبرِ جمیل دی دعا کیتی۔ انہاں آکھیا جو نائب صوبیدار ہدایت امان جرات تے بہادری دی عظیم مثال قائم کریندیں ہوئیں وطن دی سرحداں دے تحفظ کیتے آپݨی جان قربان کر ݙتی۔ صدرِ مملکت دہشت گرداں دی دراندازی دی کوشش ناکام بݨاوݨ تے 12 خوارج تے افغان طالبان کوں جہنم واصل کرݨ تے سکیورٹی فورسز دی پیشہ ورانہ مہارت تے مستعدی کوں خراجِ تحسین پیش کیتا۔ انہاں آکھیا جو افغان حکومت دی دہشت گرد عناصراں دی سرپرستی تے معاونت علاقائی امن و سلامتی کیتے سنگین خطرہ اے، پاکستانی ریاست دے تحمل، احتیاط تے ذمہ دارانہ رویے کوں اگر غیر قانونی تے غیر نمائندہ افغان طالبان حکومت اساݙی کمزوری سمجھی اے تاں اے ایں دی سنگین حماقت اے، پاکستان نہ صرف انہاں دراندازی کرݨ آلے دہشت گرداں کوں جہنم واصل کر سڳدے بلکہ انہاں دے سرپرستاں کوں وی نیست و نابود کر سڳدے، بہتر اے جو اے ٹولا آپݨی پالیسیاں تے آپݨے مفاد اچ نظرثانی کرے۔