خیبر پختونخوا اچ دہشت گردی دے خلاف عدم تعاون تے آئینی مشینری دی ناکامی، صدرِ مملکت ایمرجنسی نافذ کر ݙتی، وزیراعلیٰ تے کابینہ فارغ، انتظامی کنٹرول گورنر دے حوالے، مقررہ وقت دے اندر توثیق قومی اسمبلی تے سینیٹ توں تھیسی، وفاقی وزراء

اسلام آباد۔11 اکتوبر (اے پی پی) وفاقی حکومت خیبر پختونخوا اچ دہشت گردی دے ودھدے ہوئے سنگین خطرات، صوبائی حکومت دی عدم دلچسپی تے آئینی مشینری دی ناکامی دے بعد آئین دے آرٹیکل 232 تے 234 دے تحت صوبے اچ فوری طور تے ایمرجنسی نافذ کر تے صوبائی حکومت کوں غیر فعال کر ݙتے اتے تمام تر انتظامی اختیارات گورنر خیبر پختونخوا دے سپرد کر ݙتن۔ ݙو گھنٹے توں ودھ طویل وفاقی کابینہ دے تفصیلی اجلاس اچ گورنر خیبر پختونخوا دی تشویشناک رپورٹ تے سکیورٹی اداریاں دے مواد دا جائزہ گھنݨ دے بعد وزیراعظم صدرِ مملکت کوں ایمرجنسی دے نفاذ دی ایڈوائس بھیجی، جیندیاں قانونی ضروتاں پوری تھیوݨ دے بعد وفاقی وزیرِ داخلہ محسن نقوی تے وفاقی وزیرِ قانون سینیٹر اعظم نذیر تارڑ وفاقی وزیرِ اطلاعات و نشریات عطا تارڑ، وزیرِ مملکت داخلہ سینیٹر طلال چاودری تے ثمر بلور دے نال مشترکہ پریس کانفرنس اچ باضابطہ اعلان کیتا۔ وفاقی وزیرِ داخلہ محسن نقوی صورتحال دا تفصیلی پس منظر ݙسیندے ہوئیں آکھیا جو اے فیصلہ کوئی سوکھا اقدام نہ ہئی بلکہ وفاقی حکومت ہک مہینے توں ودھ عرصے توں مسلسل کوشش کریندی رہی جو خیبر پختونخوا حکومت کوں نال رلا تے دہشت گردی دے خلاف متحد تھی تے لڑیا ون٘ڄے تے او خود ذاتی طور تے پسِ پردہ رابطیاں اچ رہیے۔ انہاں واضح کیتا جو پی ٹی آئی دے لانگ مارچ توں پہلے انہاں دے تمام مطالبات، چاہے او ملاقاتاں ہوون یا علاج، پورے کیتے ویندے پئے ہن اتے وزیراعظم دے دورۂ نیویارک توں پہلے وی اپوزیشن لیڈراں نال ڳالھ مہاڑ طے ہئی مگر اتھاں توں حتمی جواب نہ ملیا۔ بعد اچ صدر تے وزیراعظم دی بݨائی گئی کمیٹی دے تحت پی ٹی آئی رہنماواں نال مذاکرات تھئے، جتھاں اسد قیصر دہشت گردی دے خلاف رل تے لڑݨ دا عزم ظاہر کیتا تاہم کے پی حکومت کوں آن بورڈ کرݨ دے معاملے تے ڈیڈ لاک رہیا۔ مذاکرات اچ ترائے توں چار وار ڈرافٹ فائنل تھیا تے انہاں دی تجاویز شامل کیتیاں ڳئیاں، مگر ہر واری صوبائی حکومت ولوں نواں موقف سامݨے آن تے معاملے کوں سبوتاژ کیتا ڳیا۔ رات پوݨے 12 وجے تئیں حتمی رابطے کیتے ڳئے تانجو کوئی درمیانی راہ نکل سڳے مگر کے پی قیادت ولوں کوئی مثبت جواب نہ آیا۔ مولانا فضل الرحمان دی وزیراعظم تے پی ٹی آئی نال ملاقاتاں وی بے نتیجہ رہیاں۔ محسن نقوی واضح کیتا جو وفاق کوں دھرنے یا لانگ مارچ توں کوئی مسئلہ نہ ہئی، اصل معاملہ دہشت گردی دا ہئی جیندے تے کے پی قیادت تعاون نئی کیتا۔ وزیرِ داخلہ ݙسایا جو صوبے دے 12 اضلاع اچ صورتحال ایں حد تک خراب اے جو شام دے بعد شہری گھراں توں نئی نکل سڳدے، الیکشن کمیشن دے سینیئر افسر کوں شہید کیتا ڳیا، پولیس دی مسلسل ٹارگٹ کلنگ تھیندی پئی اے، کسٹمز تے فورسز کوں نشانہ بݨایا ویندا پئے۔ انہاں آکھیا جو اساں کے پی حکومت دے نال رل تے پہلے 5 اضلاع اچ پولیس کوں مضبوط بݨاوݨ، ایف سی تے فوج کوں بتدریج کݙهݨ تے تمام درکار فنڈز فراہم کرݨ دا منصوبہ بݨایا مگر چار مہینے گزرݨ دے باوجود ایں تے صوبائی سطح تے کوئی پیشرفت نہ تھی سڳی۔ وفاق تے صوبے دی خارجہ پالیسی مختلف نئی تھی سڳدی تے طالبان نال تعلقات وی کہیں توں ڈھکے چھپے نئی ہن۔ پچھلے ݙیݙھ سال اچ دہشت گردی دے واقعیاں اچ 195 فیصد تے شہادتاں اچ 113 فیصد اضافہ تھیا اے جݙانجو پولیس کوں ݙتے ڳئے 20 ارب دے بجٹ تے احسان جتایا ویندے تے دہشت گرد دی تعریف تے بحث کیتی ویندی اے۔ محسن نقوی آکھیا جو اگر روزانہ جواناں دی شہادتاں کرواوݨیاں ہن تے صوبائی حکومت اونرشپ نئی گھنݨی ہئی تاں وفاق دے پاس ریاست کوں بچاوݨ کیتے ایں فیصلے دے علااو کوئی ݙوجھا راستہ نہ بچا ہئی۔ وفاقی وزیرِ قانون سینیٹر اعظم نذیر تارڑ قانونی پہلواں تے بریفنگ ݙیندے ہوئیں آکھیا جو قانونی تقاضے پورے تھیوݨ دے بعد میڈیا کوں آگاہ کیتا ویندا پئے۔ کابینہ دے ݙو گھنٹے طویل اجلاس اچ گورنر خیبر پختونخوا ولوں موصولہ خط تے غور کیتا ڳیا، جیندے اچ آئین دے آرٹیکل 234 دے تحت واضح کیتا ڳیا ہئی جو صوبے اچ آئینی بریک ڈاؤن تھی ڳئے اتے حکومت دی رٹ غائب اے۔ رپورٹ شدہ واقعیاں دے مطابق دہشت گردی اچ 196 فیصد اضافہ تھیا اتے سڈنی دی عالمی تنظیم پاکستان کوں دہشت گردی توں بدترین متاثرہ ملکاں اچ سرِ فہرست رکھ ݙتے، جیندے نال معیشت تے سرمایہ کاری کوں شدید دھچکا لڳدا پئے۔ انہاں واضح کیتا جو آئین دا آرٹیکل 149(4) وفاق کوں امن و امان نال متعلق صوبیاں کوں احکامات ݙیوݨ دا اختیار ݙیندے جݙانجو آرٹیکل 232 تے 234 دے تحت سنگین اندرونی تے بیرونی خطرات دے پیشِ نظر صدرِ مملکت ہنگامی اختیارات استعمال کیتے۔ اعظم نذیر تارڑ احکامات دی تفصیل ݙسیندے ہوئیں آکھیا جو صدارتی پروکلیمیشن دے تحت خیبر پختونخوا دی صوبائی حکومت غیر فعال تھی ڳئی اے تے وزیراعلیٰ، صوبائی وزراء، مشیران، معاونینِ خصوصی تے ایڈوکیٹ جنرل دے اختیارات ختم کر تے تمام اختیارات گورنر کے پی دے سپرد کر ݙتے ڳئن جنہاں دی معاونت کیتے 11 رکنی مشاورتی کونسل تشکیل ݙتی ویسے۔ شدید متاثرہ 12 اضلاع کیتے گورنر تے چیف سیکرٹری دے تحت ہک انڄ خصوصی سیکرٹریٹ تے ری کنسٹرکشن اینڈ ڈویلپمنٹ کونسل (ARDC) قائم کر ݙتی ڳئی اے جیندا ایڈمنسٹریٹر ایڈیشنل چیف سیکرٹری رینک دا افسر ہوسی۔ ایں توں علااو آئین دے آرٹیکل 245 دے تحت سکیورٹی فورسز دی ازسرِ نو مؤثر تعیناتی دا فریش حکم نامہ وی جاری کر ݙتے ڳئے تاجو امن و امان دی بحالی کوں یقینی بݨایا ون٘ڄ سڳے۔ انہاں واضح کیتا جو آندے ݙینہاں اچ قومی اسمبلی تے سینیٹ دا مشترکہ اجلاس سݙ تے ایں صدارتی فیصلے دی آئینی توثیق کروائی ویسے۔