خیبر پختونخوا اچ خوش آئند تبدیلی دا خیرمقدم کریندوں، دہشت گردی دے خلاف جنگ پوری قوت نال لڑی ویسے: عطا اللہ تارڑ

اسلام آباد۔12 اکتوبر (اے پی پی) وفاقی وزیرِ اطلاعات تے نشریات عطا اللہ تارڑ خیبر پختونخوا اچ خوش آئند تبدیلی دا خیرمقدم کریندیں ہوئیں آکھیا جو دہشت گردی دے خلاف جنگ پوری قوت نال لڑی ویسے۔ سنوار کوں اتھاں مقامی ہوٹل اچ انسٹی ٹیوٹ آف سٹریٹجک سٹڈیز (آئی ایس ایس آئی) ولوں ”پاکستان اچ انسدادِ دہشت گردی دے بدلتے منظرنامے، ٹی ٹی پی، سرحد پار خطرات تے علاقائی سلامتی“ دے موضوع تے منعقدہ انٹرنیشنل کانفرنس توں خطاب کریندیں ہوئیں وفاقی وزیرِ اطلاعات آکھیا جو پاکستان گزشتہ کئی دہائیاں توں دہشت گردی دے خلاف جنگ اچ صفِ اول دا کردار ادا کریندا پئے اتے ایں مقام تے رہݨ دی اساکوں بھاری قیمت چکاوݨی پئی اے۔ دنیا دی کوئی قوم اے دعویٰ نئی کر سڳدی جو ایں دہشت گردی دی جنگ اچ 90 ہزار توں ودھ جاناں دی قربانیاں ݙیوݨ دے نال 100 ارب ڈالر توں زیادہ دے معاشی نقصانات برداشت کیتے ہوون۔ انہاں آکھیا جو پاکستان دہشت گردی دے خلاف مزاحمت، امن دے فروغ تے علاقائی سلامتی کیتے آپݨی کوششاں جاری ہن۔ وفاقی وزیر آکھیا جو دہشت گردی دے خلاف جنگ اچ پاکستان دی قربانیاں صرف آپݨے ملک کوں محفوظ بݨاوݨ توں محدود نئی بلکہ ایں توں عالمی امن کوں وی تقویت ملدی اے۔ پاکستان دہشت گردوں تے ٻئی دنیا دے درمیان ڈھال دا کردار ادا کریندا آندے۔ امریکہ تے ایران دے درمیان ثالثی دے عمل اچ پاکستان دا کردار ایں ڳالھ دا ثبوت اے جو پاکستان امن تے یقین رکھیندے تے دنیا اچ امن دے قیام کیتے سنجیدہ کوششں کریندا پئے۔ وزیراعظم شہباز شریف دی قیادت اچ انہاں کوششاں کوں اگاں ودھایا ڳیا جݙانجو نائب وزیراعظم اسحاق ڈار تے فیلڈ مارشل سید عاصم منیر وی ثالثی دے عمل اچ اہم کردار ادا کیتا جیندا عالمی سطح تے اعتراف کیتا ویندا پئے۔  عطا اللہ تارڑ آکھیا جو پاکستان تِناں چار دہائیاں توں زائد عرصے توں 40 لکھ توں زیادہ افغان مہاجراں دی میزبانی کیتی تاہم ایں فراخدلی دی پاکستان کوں بھاری قیمت ادا کرݨی پئی۔ بدقسمتی نال اساݙی مہمان نوازی تے فراخدلی دا جواب کݙاہیں ایں خیرسگالی نال نئی ݙتا ڳیا۔ انہاں آکھیا جو افغانستان اچ ہک ایجھی حکومت موجود اے جیڑھی صرف تشدد تے انتہا پسندی تے یقین رکھیندی اے۔ انہاں آکھیا جو افغانستان اچ موجود دہشت گرداں دی محفوظ پناہ گاہیں پاکستان دی سلامتی کیتے خطرہ ہن۔ اقوامِ متحدہ تے آزادانہ جائزیاں دے مطابق افغانستان اچ ٹی ٹی پی دے 6 ہزار توں ودھ دہشت گرد موجود ہن جݙانجو اتھاں دہشت گرداں دی مجموعی تعداد 20 ہزار توں ودھ ݙسائی ویندی اے۔ وفاقی وزیرِ اطلاعات آکھیا جو 2021ء اچ افغان طالبان دی واپسی دے بعد توں ٹی ٹی پی پاکستان دے خلاف حملیاں تے دہشت گردی دی سہولت کاری کیتے افغان سرزمین استعمال کریندی رہی اے۔ پاکستان حالیہ عرصے اچ ایجھیں حملیاں دا جواب ݙتے کیونجو دہشت گرداں کوں افغانستان اچ محفوظ پناہ گاہیں استعمال کر تے پاکستان تے حملے کرݨ دی اجازت نئی ݙتی ون٘ڄ سڳدی۔ انہاں واضح کیتا جو پاکستان دی امن دی خواہش کوں ایں دی کمزوری نہ سمجھیا ون٘ڄے اتے پاکستان پرامن بقائے آُسی تے یقین رکھیندے تاہم آپݨی سلامتی دے تحفظ کیتے پرعزم اے۔ وفاقی وزیر آکھیا جو پاکستان دے اندر دہشت گردی دے خلاف مضبوط بیانیہ تشکیل ݙتا ڳیا اے۔ آپݨے حالیہ دورۂ خیبر پختونخوا تے کاواٹ دا ذکر کریندیں ہوئیں انہاں آکھیا جو انہاں اتھاں دہشت گردی دے حملیاں اچ زخمی تھیوݨ آلے افراد نال کمبائنڈ ملٹری ہسپتال اچ ملاقات کیتی۔ انہاں آکھیا جو خیبر پختونخوا دے عوام دہشت گردی دے خاتمے کیتے پرعزم ہن تے چاہندن جو صوبے توں دہشت گردی دا مکمل خاتمہ تھیوے۔ انہاں آکھیا جو پاکستان دی حکومت، وزارتِ خارجہ تے عسکری قیادت سمیت تمام متعلقہ فریق دہشت گردی دے خاتمے تے امن دے قیام کیتے یکسو ہن۔ پاکستان دا عزم اے جو نہ صرف ملک بلکہ پورے خطے کوں دہشت گردی توں پاک کیتا ون٘ڄے۔ انہاں آکھیا جو پاکستان امن دا حامی اے اتے ہک ایجھے خطے دا خواہاں اے جتھاں خوشحالی، تعاون تے سلامتی کوں فروغ ملے۔