پاکستان دہشت گردی دے خلاف جنگ اچ لازوال قربانیاں ݙتن، افغان سرزمین توں تھیوݨ آلی دہشت گردی جویں صورت قابلِ قبول نئی، حکومت ولوں خیبر پختونخوا اچ ایمرجنسی دے سوا کوئی آپشن نہ ہا، نائب وزیراعظم اسحاق ڈار

اسلام آباد۔12 اکتوبر (اے پی پی) نائب وزیراعظم تے وزیرِ خارجہ محمد اسحاق ڈار دہشت گردی کوں خطے تے دنیا کیتے سب توں وݙا چیلنج قرار ݙیندیں ہوئیں آکھیا جو افغان سرزمین توں تھیوݨ آلی دہشت گردی جویں صورت قابلِ قبول نئی، افغانستان توں پاکستان تے حملے بند تھیوݨ چاہیدن، عوام دے جان و مال دے تحفظ، قومی معیشت دے استحکام تے دہشت گردی دے خلاف جنگ اچ ہر صوبے کوں آپݨا کردار ادا کرݨے، خیبر پختونخوا اچ ایمرجنسی لاوݨ کوئی سوکھا فیصلہ نئی ہا، حکومت کنے ایمرجنسی دے سوا کوئی آپشن نہ بچیا ہا، دھرنیاں تے احتجاج پاروں معیشت کوں شدید نقصان پوندے، قانون نافذ کرݨ آلے ادارے دہشت گردی دے خاتمے کیتے ݙینھ رات کوشاں ہن، پاکستان دہشت گردی دے خلاف جنگ اچ لازوال قربانیاں ݙتن، عالمی برادری دہشت گردی دے خلاف جنگ اچ اساݙیاں قربانیاں دا اعتراف کریندے ہوئیں ایں فتنے دے خلاف پاکستان دی مدد کرے۔ اے ڳالھیں انہاں سنوار کوں اتھاں انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) ولوں پاکستان اچ دہشت گردی دے بدلتے منظرنامے نال متعلق بین الاقوامی کانفرنس توں خطاب کریندیں ہوئیں کیتا۔ اسحاق ڈار آکھیا جو دہشت گردی خطے تے دنیا کیتے سب توں وݙا چیلنج اے، پاکستان دہشت گردی دے خلاف جنگ اچ لازوال قربانیاں دی داستان رقم کیتی اے، پاکستان ہمت، بہادری تے مضبوطی نال دہشت گردی دا سامنا کیتے، دہشت گردی دے خلاف جنگ اچ پاکستان دی معیشت کوں شدید نقصان دا سامنا کرݨا پیا، ایں جنگ اچ پاکستان 90 ہزار توں ودھ جاناں دا نذرانہ پیش کیتے، جعفر ایکسپریس تے بلوچستان اچ مزدوراں دے اغوا تے شہادتاں دا سامنا کیتے، دنیا کوں دہشت گردی دے خلاف جنگ اچ پاکستان دی قربانی دا اعتراف کرنا پوسی۔ نائب وزیراعظم تے وزیرِ خارجہ آکھیا جو دہشت گردی دے خلاف جنگ اچ ہر صوبے کوں آپݨا کردار ادا کرݨے۔ وزیراعظم شہباز شریف دی قیادت اچ دہشت گردی دے خاتمے کیتے نویں خطوط تے کم کیتا ڳئے، قانون نافذ کرݨ آلے ادارے دہشت گردی دے خاتمے کیتے ݙینھ رات کوشاں ہن، چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر دہشت گردی دے خاتمے کیتے پرعزم ہن۔ انہاں آکھیا جو فیلڈ مارشل سید عاصم منیر دی ہدایت تے روزانہ دی بنیاد تے سکیورٹی فورسز دہشت گرداں دے خلاف آپریشنز کریندیاں پئن۔ اسحاق ڈار آکھیا جو دہشت گردی دے معاملے تے ڳالھ مہاڑ کیتے افغانستان دے دورے وی کیتے ہن، افغان رجیم تے مسلسل زور ݙیندیں پئن جو او آپݨی سرزمین پاکستان دے خلاف استعمال تھیوݨ توں روکے، پاکستان دا افغانستان توں صرف ہک مطالبہ اے جو او آپݨی سرزمین پاکستان دے خلاف استعمال نہ تھیوݨ ݙیوے، اگست 2025ء اچ پاکستان، چین تے افغانستان دا سہ فریقی اجلاس وی تھیا لیکن افغان حکام آپݨے وعدے پورے نئی کیتے۔ افغانستان اچ کالعدم ٹی ٹی پی تے ٻیاں دہشت گرداں دی موجودگی خطے دے امن کیتے خطرہ اے۔ سرحد پار توں دہشت گرد دراندازی کر تے اساݙے جوآنیں تے شہریاں تے حملے کریندن۔ دہشت گرداں دی آمدورفت روکݨ کیتے پاکستان افغان سرحد تے حفاظتی باڑ لاتی اے۔ افغان سرزمین توں تھیوݨ آلی دہشت گردی سویں صورت قابلِ قبول نئی، انہاں آکھیا جو پاکستان انسانی ہمدردی دی بنیاد تے افغانستان دی ٻہوں مدد کیتی۔ انہاں آکھیا جو افغانستان سرزمین توں پاکستانی شہریاں کوں نشانہ بݨایا ویندے، جعفر ایکسپریس کوں ہائی جیک کرݨ دا منصوبہ وی افغانستان توں بݨیا، افغان طالبان رجیم دہشت گرداں کوں اسلحہ سمیت ہر قسم دی امداد بند کرے۔ افغان سرزمین توں پاکستان تے حملے وی بند تھیوݨ چاہیدن۔ انہاں آکھیا جو پاکستان بقائے ایں تے پرامن ہمسائیگی دے اصول تے پختہ یقین رکھیندے، افغان حکام دہشت گردی دے معاملے تے آپݨے وعدے نبھاون، افغان سرزمین پاکستان سمیت جویں وی ملک دے خلاف استعمال نئی تھیوݨی چاہیدی، عالمی برادری دہشت گردی دے فتنے دے خلاف پاکستان دی مدد کرے۔  اسحاق ڈار آکھیا جو پاکستان تنازعات دے پرامن حل دا حامی اے، ہݨ دنیا پاکستان کوں امن پسند ملک دے طور تے جاندی اے، خطے اچ امن کیتے پاکستان دی کوشساں جویں توں پوشیدہ نئی ، پاکستان دے خلاف منفی پروپیگنڈا کرݨ آلے ہمیشہ دی طرح نامراد رہسن۔ پاکستان دنیا دے سامھے ہر قسم دی دہشت گردی تے ایں دے حل دا طریقہ پیش کیتے۔ وزیرِ خارجہ مشترکہ دفاعی معاہدے دا ذکر کریندے ہوئیں آکھیا جو ایں معاہدے دا بنیادی مقصد خطے اچ قیامِ امن اے، مجو دفاعی معاہدہ جویں ملک دے خلاف نئی، دنیا کوں دہشت گردی تے جنگاں سمیت بہوں سارے چیلنجز دا سامݨا اے۔ ایں دا ہیڈکوارٹر ریاض اچ قائم کیتا ڳئے۔ مشترکہ دفاعی معاہدے دے تحت ہک کمیٹی وی ٻݨائی ڳئی اے۔