صارف توں ٹیکس وصول کر تے آپݨی جیب اچ پاوݨ آلے کاروبار کہیں رعایت دے مستحق نئی، ٹیکس دی مکمل استعداد دے حصول کیتے سارے ضروری اقدامات چیسوں، وزیراعظم شہباز شریف

اسلام آباد۔12 اکتوبر (اے پی پی) وزیراعظم محمد شہباز شریف پیداواری سیکٹر دے سارے شعبیاں اچ سیلز ٹیکس کیتے پیداوار دی نگرانی ایں سال دے چھیکڑ تئیں مکمل کرݨ دی ہدایت کریندیں ہوئیں آکھیا جو صارف توں ٹیکس وصول کر تے آپݨی جیب اچ پاوݨ آلے کاروبار کہیں رعایت دے مستحق نئی، ٹیکس دی مکمل استعداد دے حصول کیتے سارے تر ضروری اقدامات چیسوں۔ سنوار کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی صدارت ایف بی آر دی اصلاحات تے جائزہ اجلاس تھیا۔ اجلاس اچ وفاقی وزراء اعظم نذیر تارڑ، ڈاکٹر مصدق ملک، احد خان چیمہ، شزا فاطمہ خواجہ، وزیرِ مملکت بلال اظہر کیانی، مشیرِ وزیراعظم ہارون اختر تے متعلقہ اعلیٰ حکام شرکت کیتی۔ اجلاس کوں پیداواری شعبے اچ ٹیکس نگرانی دے نظام تے بریفنگ ݙتی ڳئی۔ اجلاس کوں ݙسایا ڳیا جو کھنڈ، سیمنٹ، تمباکو، ٹائلز تے کھاد دے شعبیاں اچ نظام مکمل طور تے نصب کیتا ڳئے۔ اجلاس کوں ٻیا ݙسایا ڳیا جو ٹیکسٹائلز، پیکیجڈ پانی، پیکیجڈ جوس تے پیکیجڈ کھیر دے شعبے اچ نگرانی دا نظام نصب کیتا ویندا پئے اتے ایں کیتے آلات دی خریداری مکمل تھی ڳئی اے۔ اجلاس کوں ݙسایا ڳیا جو سٹیل، پولٹری تے ٹائرز دے شعبے اچ آلات دی خریداری 15 اکتوبر جݙانجو چاء، گھریلو الیکٹرانکس، چمڑے، کاغذ و بورڈ تے تیل و گھیو کیتے 30 اکتوبر تئیں خریداری مکمل کر گھدی ویسے۔ ایں طرحاں انہاں سارے پیداواری شعبیاں اچ نگرانی دے نظام کوں رواں برس 31 دسمبر تئیں مکمل فعال کر ݙتا ویسے۔ اجلاس کوں ݙسایا ڳیا جو ٹیکسٹائل دے شعبے اچ جہاں بہوں ساریاں صنعتاں نگرانی دے نظام دی تنصیب اچ مزاحمت دا مظاہرہ کیتا اتھائیں نشاط ملز، الکرم ٹیکسٹائل، الکرم کاٹن ملز، J.K سپننگ ملز، صورتی انٹرپرائز، انٹرلوپ لمیٹڈ، فیصل سپننگ ملز، ابراہیم فائبرز لمیٹڈ، سفائر ٹیکسٹائلز لمیٹڈ تے نشاط چونیاں حکومتی اقدامات تے عملدرآمد کریندیں ہوئیں رضاکارانہ طور تے نگرانی دا نظام نصب کیتا۔ وزیراعظم انہاں صنعتاں دے ایں اقدام دی تعریف کیتی۔ وزیراعظم کوں ٹیکس وصولی تے ٹیکس دی استعداد دے مابین فرق تے جائزہ رپورٹ وی پیش کیتی ڳئی جیندے اچ ملک دی ٹیکس استعداد دا تخمینہ پیش کیتا ڳیا۔ اجلاس کوں ݙسایا ڳیا جو گزشتہ ترائے سالاں اچ حکومتی اقدامات پاروں 1.3 ٹریلین روپے دا اضافی ٹیکس اکٹھا کیتا ڳیا جیڑھا جو ٹیکس وصولی اچ 40 فیصد اضافہ اے۔ اجلاس کوں ݙسایا ڳیا جو اے اضافی ٹیکس انفورسمنٹ اقدامات دی بدولت کٹھا تھیا۔ وزیراعظم ایف بی آر ٹرانسفارمیشن ٹیم دی شب و روز محنت دے بعد جامع رپورٹ پیش کرݨ تے پذیرائی کیتی تے شیلڈز پیش کیتیاں۔ وزیراعظم پیداواری سیکٹر دے سارے شعبیاں اچ سیلز ٹیکس کیتے پیداوار دی نگرانی رواں برس دے اختتام تئیں مکمل کرݨ دی ہدایت کیتی تے پیداواری شعبے دا تفصیلی جائزہ گھن تے استعداد دا تخمینہ پیش کرݨ آلی ٹیم دی پذیرائی کیتی۔ وزیراعظم آکھیا جو فیس لیس نظام دے تحت کیمریاں دی مدد نال پیداوار دی نگرانی موثر بݨائی ویندی پئی اے، کیمریاں تے مشتمل پیداوار دی خودکار نگرانی دا سسٹم نصب کرݨ اچ رکاوٹاں دور کیتیاں ون٘ڄن، صارف توں ٹیکس وصول کر تے آپݨی جیب اچ پاوݨ آلے کاروبارکہیں رعایت دے مستحق نئی۔ وزیراعظم آکھیا جو پیداواری شعبے اچ جیہڑے کاروبار رضاکارانہ طور تے نگرانی دا نظام نصب کریندی پئن، انہاں کوں قدر دی نگاہ نال ݙیکھدوں، ٹیکس دی مکمل استعداد دے حصول کیتے سارے ضروری اقدامات چیسوں۔