نائب وزیراعظم اسحاق ڈار دا قدرتی آفتاں دے خطرات، انہاں توں لاحق عدم تحفظ تے سماجی و اقتصادی نقصانات اچ کمی کیتے عالمی کوششاں اچ بھرپور کردار نبھاوݨ دے پاکستان دے غیر متزلزل عزم دا اعادہ

اسلام آباد۔13 اکتوبر (اے پی پی) نائب وزیراعظم و وزیرِ خارجہ سینیٹر محمد اسحاق ڈار قدرتی آفتاں دے خطرات، انہاں توں لاحق عدم تحفظ تے سماجی و اقتصادی نقصانات اچ کمی کیتے عالمی کوششاں اچ بھرپور کردار ادا کرݨ دے پاکستان دے غیر متزلزل عزم دا اعادہ کریندے آکھیے جو قدرتی آفتاں دے خطرات اچ کمی نہ صرف انسانی ہمدردی دے تقاضیں دے تحت ضروری اے بلکہ پائیدار ترقی دے 2030ء دے ایجنڈے دے تحت پیشرفت دے حصول تے ایں کوں برقرار رکھݨ کیتے وی ناگزیر اے۔ترجمان دفترِ خارجہ توں جاری بیان موجب قدرتی آفتاں دے خطرات اچ کمی دے عالمی ݙینھ دے موقع تے اپݨے پیغام اچ نائب وزیراعظم و وزیرِ خارجہ اسحاق ڈار آکھیا جو گزریل کجھ سالاں توں پاکستان کوں موسمیاتی تبدیلیاں پاروں آوݨ آلی آفتاں دے تباہ کن اثرات دا سامݨا کرݨا پئے جنہاں اچ ول ول آوݨ آلی چھل ، گلیشیئرز دے پگھلݨ دی رفتار اچ تیزی، خشک سالی، شدید گرمی دیاں لہراں تے پاݨی دی ودھدی قلت شامل اے۔ اجوکے ساوݨ دے موسم اچ زور دے مینھ دے نتیجے اچ قیمتی جاناں تے روزگار دے ذرائع دا ضیان ایں غیر متناسب موسمیاتی ٻوجھ کوں اجاگر کریندے جیں دا پاکستان مسلسل سامݨا کریندے پئے جݙاں جو عالمی سطح تے گرین ہاؤس گیساں دے مجموعی اخراج اچ پاکستان دا حصہ ہیک فیصد توں وی گھٹ اے۔انہاں تجربیں آفتاں دے خطرات نال نبڑݨ کیتے پیشگی اقدامات، ٹیکنالوجی تے مبنی حل تے جامع حکمتِ عملی تے توجہ مرکوز کرݨ دے اساݙے عزم کوں مزید تکڑا کیتے ۔انہاں آکھیا جو قومی حکمتِ عملی برائے تخفیفِ آفتاں 2025-2030ء دی رہنمائی اچ حکومتِ پاکستان کثیرالجہتی خطرات توں نبڑݨ دا طریقۂ کار اختیار کیتا ہویا اے جیندے اچ قومی تے ذیلی قومی سطح تے روکݨ ، تیاری تے لچک پیدا کرݨ تے زور ݙتا ڳئے۔ ایں سلسلے اچ مضبوط قومی نظاماں دے قیام تے آفات دے اثرات توں متاثرہ لوکاں دی ضرورتاں موجب ردِعمل ݙیوݨ آلے سماجی تحفظ دے اقدامات متعارف کراوݨ سودھے ٹھوس اقدامات کیتے ویندے پئن۔نائب وزیراعظم و وزیرِ خارجہ آکھیا جو آفات دے خطرات اچ کمی کیتے سینڈائی فریم ورک (2015-2030ء) توں ہم آہنگ اساݙیاں پالیسیاں اچ ویلھے توں پہلے انتباہی نظاماں کوں تکڑا بݨاوݨ، ترقیاتی منصوبہ بندی اچ خطرات دی تخفیف کوں شامل کرݨ تے ابھردے ہوئے خطرات دی بہتر پیشگوئی تے انہاں توں نبڑݨ کیتے جدت تے ٹیکنالوجی توں استفادہ کرݨ کوں ترجیح ݙتی ڳئی اے۔انہاں آکھیا جو مشترکہ دریائی طاساں اچ آفات دے خطرات دا انتظام بنیادی طور تے سرحد پار تعاون دا متقاضی اے، ایں کیتے ایں دی موثریت دا انحصار دریا نال منسلک ملکاں وچال تعاون، بین الاقوامی قانون دی پاسداری تے نافذ العمل معاہدیں تے سمجھوتیاں دے مکمل احترام تے اے۔ انہاں عالمی برادری تے زور ݙیندے آکھیا جو ترقی پذیر ملکاں کوں موسمیاتی تبدیلی دے تکھے ودھدے اثرات اچ کمی گھن آوݨ تے انہاں نال مطابقت پیدا کرݨ دے قابل بݨاوݨ کیتے تعاون، ٹیکنالوجی دی منتقلی تے مالی معاونت دے طریقۂ کار کوں تکڑا بݨایا ونڄے۔ نائب وزیراعظم و وزیرِ خارجہ آکھیا جو پاکستان ہک زیادہ محفوظ، آفتاں دے مقابلے اچ زیادہ مضبوط تے پائیدار دنیا دی تعمیر کیتے اپݨی اجتماعی ذمہ واری دے اعادے اچ سارے ملکاں دے نال یکجہتی دا اظہار کریندے۔