وزیرِ داخلہ محسن نقوی نال روسی ہم منصب ولادیمیر کولاکولتسیف دی ملاقات، سکیورٹی تے انسدادِ جرائم اچ ݙوپاسہ تعاون دے فروغ تے ڳالھ مہاڑ

اسلام آباد۔14 اکتوبر (اے پی پی) روس دے وزیرِ داخلہ ولادیمیر کولاکولتسیف وفاقی وزارتِ داخلہ دا دورہ کیتا، جتھاں انہاں وفاقی وزیرِ داخلہ محسن نقوی نال اہم ملاقات کیتی تےݙوہیں ملکاں وچال وفود دی سطح تے تفصیلی مذاکرات تھئے، مذاکرات اچ آپسی دلچسپی دے معاملیاں، مشترکہ مفادات دے شعبیاں اچ تعاون دے فروغ تے سکیورٹی معاملیاں تے تفصیلی ڳالھ مہاڑ کیتی ڳئی۔ وزارتِ داخلہ توں جاری بیان دے مطابق ایں موقع تےݙوہیں ملکاں دے درمیان منظم جرائم دی روک تھام کیتے اشتراکِ کار تے معلومات دے تبادلے دی مفاہمتی یادداشت (ایم او یو) تے دستخط کرݨ دا فیصلہ کیتا ڳیا۔ݙوہیں وزرائے داخلہ مجرمان دی حوالگی (ایکسٹراڈیشن) تے سزا یافتہ افراد دے تبادلے نال متعلق معاہدیاں کوں جلد حتمی شکل ݙیوݨ سمیت ری ایڈمیشن معاہدے تے فوری عملدرآمد تے اتفاق کیتا۔ ایں توں علاوہ اینٹی نارکوٹکس فورس (اے این ایف) تے روس دے متعلقہ اداریاں دے مابین منشیات دی سمگلنگ روکݨ کیتے تعاون ودھاوݨ دا وی فیصلہ کیتا ڳیا۔ فریقین ایں امر تے وی اتفاق کیتا جوݙوہیں ملکاں دی وزارتِ داخلہ دے ورکنگ گروپس جلد ہک ٻئے دے ملک دا دورہ کریسن۔ ملاقات اچ پاکستان توں روس ہنرمند افرادی قوت (اسکلڈ ورک فورس) بھیجݨ، سیاحاں تے تاجر برادری کیتے ویزا دا حصول آسان بݨاوݨ، سائبر کرائم دی روک تھام تے نیشنل پولیس اکیڈمی اسلام آباد و روس دی پولیس اکیڈمی دے مابین تربیتی شراکت داری تے وی غور کیتا ڳیا۔ وفاقی وزیرِ داخلہ محسن نقوی ڳالھ مہاڑ کریندے ہوئیں آکھیا جو منظم جرائم دی روک تھام دا مجوزہ معاہدہ پاک روس آپسی تعاون دے فروغ اچ اہم سنگِ میل ثابت تھیسی۔ انہاں آکھیا جو ویزا نظام اچ آسانیاں پیدا کرݨ نال ݙوہیں قوماں دے درمیان عوامی رابطیاں تے تجارتی سرگرمیاں کوں فروغ ملسی۔ محسن نقوی دا آکھݨ ہا جو پاکستان سائبر کرائم دے سدِباب کیتے روس دی جدید تکنیکی مہارت تے تجربات توں استفادہ حاصل کرݨ چاہندے۔ انہاں ݙسایا جو ایں ویلے قریباً 1300 پاکستانی طلبہ روس دیاں مختلف جامعات اچ زیرِ تعلیم ہن تے پاکستان چاہندے جو ٻیا طلبہ اعلیٰ تعلیم کیتے روس ون٘ڄن۔ ایں موقع تے روسی وزیرِ داخلہ ولادیمیر کولاکولتسیف آکھیا جو دہشت گردی، منشیات دی سمگلنگ تے غیر قانونی نقل مکانی سمیت تمام قسم دے منظم جرائم دی بیخ کنی کیتے مشترکہ تے ٹھوس اقدامات ناگزیر ہن۔ انہاں ݙسایا جو روس مؤثر حکمتِ عملی تے اقدامات پاروں آپݨے ملک اچ سائبر کرائم دی شرح اچ 33 فیصد نمایاں ڳھٹکی حاصل کیتی اے تے او ایں میدان اچ پاکستان دے نال اشتراک دا خواہاں اے۔ مذاکرات اچ وزیرِ مملکت برائے داخلہ طلال چوہدری، پاکستان اچ تعینات روسی سفیر، سپیشل و ایڈیشنل سیکریٹریز داخلہ، ڈی جی ایف آئی اے، کمانڈنٹ نیشنل پولیس اکیڈمی، آئی جی ایف سی، ڈی جی نیشنل فرانزک ایجنسی، ڈی جی این سی سی آئی اے، ڈی جی پاسپورٹ، چیف کمشنر اسلام آباد، آئی جی اسلام آباد پولیس تے ٻئے اعلیٰ حکام وی شرکت کیتی۔