پاکستان تے عمان وچال ݙوہیں پاسیاں دی تجارت، اقتصادی سرگرمیاں تے سرمایہ کاری دے فروغ دے وسیع موقعے موجود ہن، مسلسل رابطے تے باقاعدہ مشاورت ضروری اے: نائب وزیراعظم محمد اسحاق ڈار

اسلام آباد۔14 اکتوبر (اے پی پی) نائب وزیراعظم تے وزیرِ خارجہ سینیٹر محمد اسحاق ڈار آکھیا جو پاکستان اتے عمان وچال ݙوہیں پاسیاں دی تجارت، اقتصادی سرگرمیاں تے سرمایہ کاری دے فروغ دے وسیع موقعے موجود ہن جنہاں توں فائدے کیتے مسلسل رابطے تے باقاعدہ مشاورت ضروری اے، پاکستان تے عمان کوں علاقائی امن کیتے فعال کردار ادا کرݨا تے جاری تنازعیاں دے حل کیتے مشترکہ کوشساں جاری رکھݨی چاہیدن۔ عمان دے وزیرِ خارجہ سید بدر بن حمد بن حمود البوسعیدی علاقائی سطح تے مذاکرات تے سفارت کاری دے فروغ کیتے پاکستان دے تعمیری کردار کوں سراہندیں ہوئیں آکھیا جو خطے اچ قیامِ امن کیتے پاکستان دیاں کوشساں قابلِ تعریف ہن۔ اے ڳالھیں انہاں پاکستان عمان مشترکہ وزارتی ڳھٹکیشن دے 8ویں اجلاس اچ افتتاحی کلمات ادا کریندے ہوئیں کیتا۔ نائب وزیراعظم عمان دے وزیرِ خارجہ تے انہاں دے وفد دا پاکستان آوݨ تے خیرمقدم کیتا اتے صدرِ مملکت تے وزیراعظم پاکستان ولوں عمان دے سلطان کیتے نیک خواہشات دا اظہار کیتا۔ انہاں آکھیا جو پاکستان تے عمان دے درمیان مشترکہ وزارتی ڳھٹکیشن دا اجلاس 7 سال بعد منعقد تھیندا پئے،ݙوہیں ملکاں ایں ڳالھ تے اتفاق کیتے جو آندے اجلاساں دے درمیان اتنا طویل وقفہ نئی ہووݨا چاہیدا تانجو تجارت، اقتصادی سرگرمیاں تے سرمایہ کاری دے موقعیاں توں بھرپور فائدہ چاتا ون٘ڄ سڳے۔ سینیٹر محمد اسحاق ڈار آکھیا جوݙوہیں ملکاں دے درمیان محدود سطح دی ملاقات اچ ݙوہیں پاسیاں دی دلچسپی دے مختلف شعبیاں تے عالمی و علاقائی معاملیاں تے ڳالھ مہاڑ کیتی ویسی جنہاں اچ امریکہ ایران جنگ، آبنائے ہرمز، باب المندب، فلسطین، غزہ تے جموں و کشمیر سمیت خطے دے ٻئے اہم مسائل شامل ہن۔ انہاں علاقائی امن دے فروغ تے امتِ مسلمہ دے درمیان امن کیتے عمان دی قیادت دیاں کوشساں کوں سراہندیں ہوئیں آکھیا جو پاکستان انہاں کوشساں دا معترف اے۔ انہاں آکھیا جو او ذاتی طور تے وی عمانی قیادت دیاں کاوشاں دے قدردان ہن اتے ڄاݨڈن جو ایں مقصد کیتے کتنی محنت کیتی ڳئی اے۔ نائب وزیراعظم آکھیا جو پاکستان تے خلیج تعاون کونسل (جی سی سی) دے درمیان تعلقات منفرد نوعیت دے ہن۔ݙوہیں ملک اسلامی تعاون تنظیم (او آئی سی)، اقوامِ متحدہ تے ٻیاں کثیرالجہتی اداریاں دے رکن ہن تے مختلف امور تے قریبی رابطہ کاری تے تعاون کریندن۔  ایں موقع تے عمان دے وزیرِ خارجہ سید بدر بن حمد بن حمود البوسعیدی آپݨے وفد دے نال اسلام آباد آوݨ تے خوشی دا اظہار کریندیں ہوئیں آکھیا جو پاکستان تے عمان دے درمیان تاریخ، ثقافت، روایات تے آپت دی قربت دے مضبوط رشتے موجود ہن۔ انہاں آکھیا جو پاکستان تے عمان دے درمیان ݙوہیں پاسیاں دے رابطیاں دا مقصد مختلف شعبیاں اچ تعاون کوں فروغ ݙیوݨ تےݙوہیں ملکاں دی عوام کیتے ودھ توں ودھ فائدیاں دے موقعے پیدا کرݨ اے۔ عمانی وزیرِ خارجہ آکھیا جو پاکستان-عمان مشترکہ وزارتی ڳھٹکیشن دا اٹھواں اجلاس ݙوہیں پاسیاں دے تعاون کوں اگوں ودھاوݨ دا ہک اہم ذریعہ اے،ݙوہیں ملکاں دی قیادت اجلاساں کوں زیادہ باقاعدگی نال منعقد کرݨ دا مشترکہ عزم کیتے، آپت دیاں ملاقاتاں تے رابطیاں اچ اضافے نال ݙوہیں ملکاں دی قیادت تے عوام دیاں توقعات کوں پورا کرݨ کیتے زیادہ مؤثر پیشرفت ممکن تھیسی۔ عمانی وزیرِ خارجہ اجلاس دی تیاریاں اچ ݙوہیں ملکاں دے حکام دی محنت تے کوششاں دا اعتراف کریندے ہوئیں انہاں دا شکریہ ادا کیتا۔ انہاں آکھیا جو اقتصادی تعاون تے خصوصی توجہ ݙیوݨ دی ضرورت اے کیونجو پاکستان تے عمان ݙوہیں اہم اقتصادی تبدیلیاں دے عمل توں گزردے پئن تے انہاں دے درمیان تجارت، لاجسٹکس، بندرگاہواں دے رابطیاں، توانائی، غذائی تحفظ، ٹیکنالوجی تے سیاحت سمیت متعدد شعبیاں اچ تعاون دے وسیع امکانات موجود ہن۔ انہاں امید ظاہر کیتی جو مشترکہ وزارتی ڳھٹکیشن دا اجلاس ݙوہیں ملکاں دے درمیان بامعنی پیشرفت تے عملی تعاون دے فروغ کیتے ہک مؤثر پلیٹ فارم ثابت تھیسی۔