قیمتی پتھراں دی برآمدات ودھاوݨ کیتے مؤثر اقدامات کیتے ون٘ڄن، منصوبیاں اچ تاخیر برداشت نئی، وزیراعظم شہباز شریف

اسلام آباد۔14 اکتوبر (اے پی پی) وزیرِ اعظم محمد شہباز شریف قیمتی پتھراں تے جواہرات دے پائلٹ پراجیکٹ دی تیاری اچ سست روی تے شعبے دی ترقی کیتے اقدامات اچ تعطل تے برہمی دا اظہار کریندیں ہوئیں ترجیحی بنیاداں تے معینہ مدت دے نال لائحہ عمل مرتب کر تے پیش کرݨ دی ہدایت کیتی اے۔ وزیرِ اعظم محمد شہباز شریف دی صدارت قیمتی پتھراں تے جواہرات دے شعبے دی ترقی تے انہاں دی برآمدات اچ اضافے کیتے اقدامات دے حوالے نال جائزہ اجلاس بدھ کوں اتھاں تھیا۔ وزیرِ اعظم آفس دے میڈیا ونگ توں جاری بیان دے مطابق وزیرِ اعظم اجلاس نال خطاب کریندیں ہوئیں آکھیا جو قیمتی پتھراں تے جواہرات دے شعبے دی ترقی دے حآلے نال اقدامات ترجیح ہن، ایں حآلے نال کہیں قسم دی سست روی قبول نہیں۔ انہاں ہدایت کیتی جو قیمتی پتھراں دی کان کنی تے انہاں دی تراش خراش نال ویلیو ایڈیشن دا ہک پورا ایکو سسٹم تیار کیتا ون٘ڄے۔ وزیرِ اعظم آکھیا جو غیر معیاری طریقے نال کان کنی تے قیمتی پتھراں دی سمگلنگ نال ملک کوں سالانہ ارباں ڈالر دا نقصان تھیندے۔ پاکستان کوں اللہ رب العزت قدرتی وسائل دی دولت نال مالامال کیتے۔ وزیرِ اعظم حکم ݙتا جو قیمتی پتھراں تے معدنیات دے وسیع ذخائر نال برآمدات اچ اضافے کیتے ترجیحی بنیاداں تے اقدامات کیتے ونڄن، خطے دے ٻیاں ملکاں وانگوں قیمتی پتھراں تے جواہرات کیتے برانڈ پاکستان تے کم کرن، ویلیو ایڈیشن کیتے سینٹرز آف ایکسیلینس دے جلد قیام دا لائحہ عمل مرتب کیتا ون٘ڄے۔ وزیرِ اعظم پائلٹ پراجیکٹس تے قیمتی پتھراں دیاں ماڈل مائنز دی تعمیر کیتے تمام تر رکاوٹاں دور کرݨ تے منصوبیاں کوں جلد مکمل کرݨ دی ہدایت کیتی۔ اجلاس اچ وزیرِ اعظم کوں قیمتی پتھراں دی کھوج، تراش خراش تے انہاں دی ویلیو ایڈیشن دے بعد برآمدات کیتے تیاری دے پائلٹ پراجیکٹ تے پیشرفت دے بارے اچ تفصیلی بریفنگ ݙتی ڳئی۔ اجلاس کوں ݙسایا ڳیا جو حسین آباد سکردو اچ سینٹر آف ایکسیلینس منصوبے کیتے 4.8 کنال زمین منتقل تھی ڳئی اے، منصوبے کیتے فنڈز دستیاب ہن تے تعمیر جلد شروع کر ݙتی ویسے۔ اجلاس کوں ٻیا ݙسایا ڳیا جو آزاد جموں و کشمیر تے اسلام آباد اچ منصوبے کیتے زمین دی نشاندہی تھی ڳئی اے، اسلام آباد اچ سینٹر آف ایکسیلینس دی تعمیر تئیں ایں کوں متبادل ڄاہ تے مکمل طور تے آپریشنل کر ݙتا ویسے۔ اجلاس کوں شعبے دی ترقی کیتے پالیسی اقدامات تے وی بریفنگ ݙتی ڳئی جیندے اچ ݙسایا ڳیا جو قیمتی پتھراں تے جواہرات دے حآلے نال نشاندہی شدہ علاقیاں دی جیولاجیکل میپنگ مکمل تھی ڳئی اے جیندے اچ گلگت بلتستان، آزاد جموں تے کشمیر تے خیبر پختونخوا اچ 8 نویں بلاکس دی قیمتی پتھراں دی دریافت دے حوالے نال ٻیا کم کیتے نشاندہی کیتی ڳئی اے۔ اجلاس اچ ݙتی ڳئی بریفنگ دے مطابق ایں سال شعبے دی ترقی کیتے پبلک سیکٹر ڈیویلپمنٹ دی مد اچ ہک ارب روپے مختص کیتے ڳئن۔ برآمد کنندگان دی سہولت کیتے 7 شہراں دی 10 بینکاں دی 80 شاخاں اچ ایکسپورٹ فیسیلیٹیشن ڈیسک قائم کیتے ڳئن۔ وزیرِ اعظم آندے ہفتے قیمتی پتھراں تے جواہرات کیتے سینٹرز آف ایکسیلینس دے قیام تے شعبے دی ترقی دے حوالے نال اقدامات دا جامع لائحہ عمل مرتب کر تے پیش کرݨ دی ہدایت کیتی۔ اجلاس اچ وفاقی وزراء جام کمال خان، ڈاکٹر مصدق مسعود ملک، احد خان چیمہ، احسن اقبال، عطا اللہ تارڑ، علی پرویز ملک، مشیرِ وزیرِ اعظم ہارون اختر، وزیرِ مملکت بلال اظہر کیانی تے متعلقہ اعلیٰ حکام شرکت کیتی۔