ملک دا ساریں توں اہم مسئلہ دہشت گردی اے لیکن پی ٹی آئی کݙاہیں دہشت گردی دی مذمت نی کیتی، خواجہ محمد آصف

اسلام آباد۔14 اکتوبر (اے پی پی) وزیرِ دفاع خواجہ محمد آصف آکھیے جو ملک دا ساریں توں اہم مسئلہ دہشت گردی اے لیکن پی ٹی آئی کݙاہیں دہشت گردی دی مذمت نی کیتی کیوں جو ریاستِ پاکستان انہاں دی حریف تے افغانستان دے طالبان انہاں دے حلیف ہن، دہشت گردی دے خلاف جنگ لڑݨ آلی افواج کوں ہݨ اے یقین ہوسی جو صوبائی حکومت انہاں دی پشت تے کھڑی اے۔ قومی اسمبلی اچ صوبہ خیبر پختونخوا اچ ایمرجنسی دے نفاذ تے پیش کیتی ڳئی قرارداد دے حق اچ خطاب کریندے وزیرِ دفاع خواجہ محمد آصف آکھیا جو اتھاں کئی ݙہاکیں توں تقاریر اچ ایجھے معاملے چاتے ویندن جنہاں دی ماضی اچ مماثلت نی کیتی ویندی، ایں ایوان اچ پی ٹی آئی اساکوں ایں ڳالھ تے آمادہ کرݨ چاہندی ہئی جو افغانیاں کوں کے پی اچ کیویں آباد کیتا ونڄے، ابھی نندن دا مسئلہ جݙݨ آیا تاں اساکوں سݙیا ڳیا جو اساں ایں کوں واپس کرݨا اے، انہاں کوں اپݨا کیس پیش کرݨ توں پہلے اے ڳالھ ݙیکھݨی چاہیدی اے جو انہاں دیاں اپݨی حرکتاں کیا ہن، ایں ایوان اچ تے ایوان توں ٻاہر بانی پی ٹی آئی جنرل باجوہ دیاں تعریفاں کریندے نہ تھکدے ہن، جݙݨ تئیں قول تے فعل اچ تضاد رہسی ملک دے حالات نہ بدلسن۔انہاں آکھیا جو ہݨ ڳالھ جیل اچ کھاݨیں دی لسٹ تے پڄ چکی اے، جݙݨ میں جیل ہم تاں زور دے پالے اچ میکوں کمبل تئیں نہ ݙتا ڳیا، گیزر لڳا تاں حکم آیا جو گیزر لہا گھدا ونڄے۔ انہاں آکھیا جو انہاں کوں تنقید کریندے ماضی کوں حذف نی کرݨا چاہیدا، نواز شریف تے مریم نواز جݙݨ اڈیالہ جیل اچ ہن تاں گرمی دا مقابلہ کرݨ کیتے سر تے کپڑا پُسا تے رکھیندے ہن۔ انہاں آکھیا جو میں جیل ہمت نال ایں کیتے کٹی اے کیوں جو میں نواز شریف دا وفادار ہاں تے میݙے اپݨے نظریات ہن۔انہاں آکھیا جو اساں وی عدالتاں اچ ویندے ہاسے لیکن اساں او ایشو نی بݨائے جیڑھے اے لوک بݨیندے پئن۔ انہاں آکھیا جو اساݙا مسئلہ صرف دہشت گردی دا اے جو پہلے ترائے سالاں اچ 2900 واقعات ہوندن تے گزریل سال 3700 واقعات تھئے، حمزہ شہباز ساریں توں لمبی قید کٹی، ایں کیتے اساں ڈی چوک اچ ماتم نی کیتا، نہ جلوس کڈھیے۔انہاں آکھیا جو وزیراعلیٰ کے پی افغانستان اچ ٻیٹھے بندے توں ہدایت گھندے ہن، انہاں دی حریف پاکستان دی ریاست اے تے حلیف افغانستان دے طالبان ہن۔ انہاں آکھیا جے انہاں دی گزریل 13 سالاں دی حکمرانی دا موازنہ کیتا ونڄے جیڑھا باقی صوبے کتھاں ہن تے کے پی کتھاں اے؟ کے پی اچ اپݨی اخلاقی برتری کیتے حکمرانی بہتر کرݨی چاہیدی ہئی لیکن انہاں اتھاں دا نظام تار تار کرݙتے، وزیرِ داخلہ گزریل ݙینھ سینیٹ اچ ہر ڳالھ تفصیل نال ݙسا ݙتی جو ڳالھ مہاڑ دا عمل کیں دے آکھݨ تے ناکام تھیا، ایں ایوان اچ اتنی ڈھٹائی دے نال اے نی آکھݨا چاہیدا جو اے آبِ زم زم تے کھیر دے دھوتے ہن، غلطیاں اساں ساریں توں تھئن لیکن ایوان اچ اسمائے حسنیٰ دے تلے کھڑ تے کوڑ نی مارݨا چاہیدا۔