عمران خان سیاسی قیدی نی بلکہ 190 ملین پاؤنڈ دے مقدمے اچ سزا یافتہ ہن، پاکستان کوں سیاسی لانگ مارچاں دی بجائے اقتصادی لانگ مارچ دی لوڑھ اے،وفاقی وزیرِ احسن اقبال

اسلام آباد۔14 اکتوبر (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو عمران خان سیاسی قیدی نی بلکہ 190 ملین پاؤنڈ دے مقدمے اچ سزا یافتہ ہن، پاکستان کوں سیاسی لانگ مارچاں دی بجائے اقتصادی لانگ مارچ دی لوڑھ اے۔قومی اسمبلی اچ خیبر پختونخوا اچ ایمرجنسی دے نفاذ تے بحث اچ ڳالھ کریندے انہاں آکھیا جو مذاکرات شروع کرݨ کیتے رات کوں کوششاں کیتیاں ویندیاں ریہاں لیکن ݙوجھے پاسوں تاخیر کیتی ڳئی، اساں وی انتظار کریندے رہ ڳیوں جو مذاکرات دا عمل شروع تھیوے لیکن دیر کرݙتی ڳئی۔وفاقی وزیر آکھیا جو 12 اکتوبر دے ماورائے آئین اقدام تے 11 اکتوبر کوں 1973ء دے آئین دے تحت اختیار استعمال کرݨ اچ زمین آسمان دا فرق اے، خیبر پختونخوا اچ ایمرجنسی دا اقدام کوئی خوشگوار فیصلہ کائنی بلکہ انتہائی مجبوری اچ چاتا ڳیا قدم اے، کاش ݙوجھے پاسوں دہشت گردی دے خلاف مطلوبہ یقین ݙوا ݙتا ویندا۔ انہاں آکھیا جو 2013ء دے بعد خیبر پختونخوا دے پختون بھراویں دے مونڈھے جنازے چیندے چیندے تھک ڳئے ہن تے روزانہ خودکش حملے تھیندے ہن۔ نواز شریف دی حکومت بھرپور کارروائی دے ذریعے صوبے کوں دہشت گردی توں نجات ݙیوائی تے امن بحال کیتا تاں جو دہشت گرداں کوں واپس گھن آتے آباد کیتا ڳیا، ایں یقین دہانی دے نال جو او غیر مسلح تھی تے آسن تے آئین دی پاسداری کریسن لیکن ایویں نی تھیا۔وفاقی وزیر آکھیا جو خیبر پختونخوا دے مختلف ضلعیں اچ شام دے بعد لوکاں دا گھراں توں نکلݨ دشوار تھی ڳیا ہئی، بنوں، ڈیرہ اسماعیل خان تے ٻئے علاقیاں اچ سرکاری ملازمین، سکیورٹی اہلکار تے شہری دہشت گردی دا نشانہ بݨدے ریہے، جنہاں خانداناں دے پیارے دہشت گردی اچ شہید تھئے، انہاں دے ݙکھ دا اندازہ لاتا ونڄ سڳدے، ایجھے اچ جݙݨ او ٹیلی ویژن تے رقص و موسیقی تے سیاسی ترانے ݙیکھدے ہوسن تاں انہاں دے دلاں تے کیا گزردی ہوسی؟ اے دہشت گردی دے خلاف وابستگی دا اظہار کائنی۔انہاں آکھیا جے بھارت دے خلاف شہداء دی یاد مناوݨ چنڳی ڳالھ اے لیکن مغربی سرحداں تے دہشت گرداں دا مقابلہ کریندے شہید تھیوݨ آلے سکیورٹی افسران تے جواناں دے نال وی یکجہتی دا اظہار کیتا ونڄݨا چاہیدے۔