وزیراعظم دی قومی تعمیر و ترقی کیتے ترجیحی شعبیں کوں قرضے ݙیوݨ آلے بینکاں دی حوصلہ افزائی، اپݨا گھر، ایس ایم ایز تے زرعی شعبے کوں قرضے وقتی ݙیوݨ ملکی معیشت دے ودھارے کیتے ناگزیر اے، وزیراعظم شہباز شریف

اسلام آباد۔14 اکتوبر(اے پی پی) وزیراعظم محمد شہباز شریف قومی تعمیر و ترقی کیتے ترجیحی شعبیں کوں قرضے ݙیوݨ آلے بینکاں دی حوصلہ افزائی کریندے آکھیے جو اپݨا گھر، ایس ایم ایز تے زرعی شعبے کوں قرضے وقتی ݙیوݨ ملکی معیشت دے ودھارے کیتے ناگزیر اے۔وزیراعظم محمد شہباز شریف دی صدارت اچ وزیراعظم اپݨا گھر سکیم، چھوٹے تے درمیانے درجے دے کاروبار تے زرعی شعبے کیتے قرضے ݙیوݨ تے مالی وسائل تئیں رسائی دے حوالے نال اعلیٰ سطحی اجلاس منعقد تھیا۔ وزیراعظم دفتردے میڈیا ونگ توں جاری بیان موجب وزیراعظم قومی تعمیر و ترقی کیتے انہاں ترجیحی شعبیں کوں قرضے ݙیوݨ اچ ودھ چڑھ تے حصہ گھنݨ آلے بینکاں دی حوصلہ افزائی کیتی۔وزیراعظم ہدایت کیتی جو جنہاں بینکاں دی ایں حوالے نال کارکردگی ہݨ تئیں غیر تسلی بخش رہی اے او اپݨی کارکردگی بہتر بݨاون تاں جو انہاں کوں وی حکومتی حوصلہ افزائی ملے۔ وزیراعظم متعلقہ وزارتاں، سیکرٹریاں تے سٹیٹ بینک کوں ایس ایم ایز، زراعت تے ہاؤسنگ فنانس دے شعبیں نال وابستہ سٹیک ہولڈرز نال مشاورت دی ہدایت ݙیندے آکھیا جو جاری سکیمیاں کوں مزید مؤثر تے نتیجہ خیز بݨاوݨ کیتے متعلقہ سٹیک ہولڈرز دیاں تجویزاں حاصل کیتیاں ونڄن۔ انہاں مشاورتی عمل اڄوکے مہینے دے چھیکڑ تئیں مکمل کرتے سفارشات پیش کرݨ دی وی ہدایت کیتی۔وزیراعظم غیر فعال پاسکو گوداماں تے سائلوز کوں پبلک پرائیویٹ پارٹنرشپ دے تحت چلاوݨ دی ہدایت کریندے آکھیا جو انہاں گوداماں تے سائلوز دی نجی شعبے دے تعاون نال کساناں دی اجناس محفوظ طریقے نال ذخیرہ کرݨ دی استعداد ودھائی ونڄے۔ وزیراعظم الائیڈ بینک دے اجناس دے ذخیرے دے گوداماں دے قیام تے ذخیرہ شدہ اجناس دے عوض کساناں کوں قرضے ݙیوݨ دے ماڈل دی پذیرائی کریندے ایں ماڈل کوں نجی شعبے دی شمولیت دے ذریعے وسعت ݙیوݨ دی ہدایت کیتی۔انہاں الائیڈ بینک دے مجوزہ ایس ایم ای پارک دے قیام کیتے سرمایہ کاری دے منصوبے دی پذیرائی کریندے اپݨا گھر ہاؤسنگ سکیم توں مستفید تھیوݨ دے متمنی لوکاں کیتے کوائف ݙیوݨ دا عمل مزید سوکھا بݨاوݨ دی ہدایت کریندے آکھیا جو ہاؤسنگ فنانس کیتے غیر متنازع ملکیتی دستاویزات (Unencumbered Title Deed) دا حصول سوکھا بݨایا ونڄے ۔ وزیراعظم ڈویلپرز فنانس متعلق کمیٹی دیاں سفارشات کوں وقتی حتمی شکل ݙے تے پیش کرݨ دی وی ہدایت کیتی۔اجلاس اچ ہاؤسنگ، زرعی شعبے تے چھوٹے و درمیانے درجے دے کاروباری اداریں کوں قرضے ݙیوݨ دے اعداد و شمار پیش کیتے ڳئے۔ اجلاس اچ ݙتی ڳئی بریفنگ موجب بینکاں دی طرفوں ترائی ترجیحی شعبیں کیتے ادارہ جاتی استعداد ودھائی ویندی پئی اے، ڈویلپرز فنانس دے ودھارے کیتے کم جاری اے تے ایں ضمن اچ ہک کمیٹی وی تشکیل ݙتی ڳئی اے، وزیراعظم اپݨا گھر سکیم دے تحت ہݨ تئیں 448 ارب روپے مالیت دے 75 ہزار 198 قرضیں دی منظوری تھئی اے۔بریفنگ اچ ݙسایا ڳیا جو ہݨ تئیں 14 ہزار لوکاں کوں 76 ارب روپے دے قرضے جاری کیتے جا چکن، اڄوکے سال 125,000 رہائشی یونٹس کیتے 700 ارب روپے دے قرضے ݙیوݨ دا ہدف رکھیا ڳئے، ہاؤسنگ فنانس دے حوالے نال درخوستاں تے کارروائی دا دورانیہ گھٹا تے صرف 15 کاروباری ݙینھ تئیں محدود کر ݙتا ڳئے، ہاؤسنگ فنانس کیتے دستاویزات دی تعداد 25 توں گھٹا تے صرف 5 کر ݙتی ڳئی اے۔بریفنگ موجب زرعی شعبے کیتے قرضیں دا مجموعی حجم 1352 ارب روپے اے جیندے توں 34 لکھ 55 ہزارلوک مستفید تھئن، جون 2027ء تئیں زرعی قرضیں دا حجم 1,500 ارب روپے تے مستفید تھیوݨ آلیں دی تعداد 45 لکھ تئیں ودھاوݨ دا ہدف مقرر اے، ایس ایم ای شعبے دے 3 لکھ 52 ہزار توں ودھ کاروباری لوکاں کوں 1,137 ارب روپے دے قرضے ݙتے ڳئن، جون 2027ء تئیں ایس ایم ای شعبے دے قرضیں دا حجم 1,500 ارب روپے تے قرض حاصل کرݨ آلے کاروباری اداریں دی تعداد دا ہدف 5 لکھ 75 ہزار مقرر اے۔بریفنگ اچ ݙسایا ڳیا جو ایس ایم ایز کیتے نظرثانی شدہ ضوابط تے ہاؤسنگ فنانس دے طریقۂ کار کوں مزید سوکھا تے مؤثر بݨاوݨ کیتے اقدامات کیتے ویندے پئن۔ اجلاس اچ قرضے ݙیوݨ اچ مشترکہ رسک شیئرنگ، سپلائی چین فنانسنگ دے ودھارے، مستند ڈیٹا شیئرنگ تے ٻئے جاری اقدامات تے وی بریفنگ ݙتی ڳئی۔اجلاس اچ وفاقی وزراء رانا تنویر حسین، ڈاکٹر مصدق مسعود ملک، عطا اللہ تارڑ، ریاض حسین پیرزادہ، احد خان چیمہ، شزا فاطمہ خواجہ، وزیراعظم دے مشیر ہارون اختر، وزیرِ مملکت خزانہ بلال اظہر کیانی، جے ایس بینک، عسکری بینک، الائیڈ بینک، حبیب میٹرو بینک، بینک آف خیبر تے ایم سی بی اسلامک بینک دے سی ای اوز تے متعلقہ اداریں دے اعلیٰ افسران شریک تھئے۔