عمران خان قوم نال کیتے گے سارے وعدے پورے کریسن ،منی لانڈرنگ خاتمے سانگے حکومت جیرھے اقدامات کریندی پئی اے ماضی اچ ایندی مثال کائنی ملدی ،وزیر مملکت موسمیاتی تبدیلی زرتاج گل

اسلام آباد ۔ 11 اکتوبر (اے پی پی) وزیر مملکت موسمیاتی تبدیلی زرتاج گل وزیر آکھیے جو عمران خان قوم نال کیتے گے سارے وعدے پورے کریسن ، منی لانڈرنگ دے خاتمے سانگے جیرھے اقدامات حکومت کریندی پئی اے ماضی اچ ایندی مثال کائنی ملدی ، تجاوزات دے خلاف اپریشن بلاتفریق کیتا ویندا پئے ،عوام دے سامنڑے جوابدہ ہوونڑ دے پابند ہوں ،کلین اینڈگرین پاکستان منصوبے کوں کامیاب بنڑاونڑ سانگے ضلعی تے تحصیل دی سطح تے سالڈ ویسٹ مینجمنٹ داقیام عمل اچ گھن آسوں ،مایوسی کھنڈاونڑ آلیں کوں منہ دی کھاونڑیں پوسی ۔خمیس کوں اے پی پی نال خصوصی گال مہاڑ کریندے ہوئیں انہاں آکھیا جو صاف ستھرا اتے سر سبز پاکستان وزیراعظم عمران خان دا ویژن ہے اے او منصوبہ ہے جیں تے ماضی دیاں حکومتاں گال کرنڑ دی پسند کائناں کریندیاں ہن کیوں جو سٹیٹس کو دے سیاستدان کڈاہیں ملک اتے قوم سانگے کائنی سوچیندے صرف کرپشن انہاں دی ترجیح ہوندی اے ۔انہاں آکھیا وزیر اعظم عمران خان کلین اینڈگرین پاکستان سانگے شجرکاری دے نال صفائی کوں اہمیت ڈیندے پن جیں سانگے اساں سالڈ ویسٹ مینجمنٹ کو ںضلع اتے تحصیل دی سطح تے گھن ویسوں تے ایندے ڈوجھے فیز اچ سالڈ ویسٹ مینجمنٹ جیرھی جو کچرا ضائع کریندی اے اساں ایندے نال انرجی پیدا کروں ۔انہاں آکھیا اساڈی حکومت پانڑیں کوں گندہ تھیونڑ توں بچاونڑ سانگے خصوصی آگاہی پرورگرام شروع کریندی پئی اے جیں سانگے یوتھ ایمبیسڈر تے علماءکرام دا تعاون وی درکار ہو سی۔ انہاںآکھیاکلین اینڈ گرین پاکستان سانگے ٹاسک فورس اتے کمیٹیاں وی بنڑایاں ویسن ۔ انہاں آکھیا میں کوشش کریندی پئی آں جو اسلام آباد توں ڈیرہ غازی خان سانگے ریل گاڈی شروع کیتی ونجے یامیانوالی ایکسپریس دے سٹیشن کو ںڈیرہ غازی خان تئیں ودھایا ونجے ۔