وزیراعظم عمران خان خصوصی بندیاں کیتے ”صحت سہولت“ پروگرام شروع کر ڈتا معاشرے دے کمزور طبقیاں دے فائدے اتے حقوق دی پاسداری ریاست دی ذمہ داری ہوندی ہے، ریاست مدینہ دے وژن دی روشنی اچ صحت سہولت اتے ”احساس“ پروگرام شروع کیتے گن، پاکستان کو ں ایجھی اسلامی فلاحی ریاست بناونڑ چاہندوں،جتھاں رحم، انسانیت اتے انصاف ہوئے، وزیراعظم عمران خان دا تقریب توں خطاب

اسلام آباد ۔ 17 اگست (اے پی پی) وزیراعظم عمران خان خصوصی بندیاں سانگے ہفتہ آلے ڈینھ ”صحت سہولت“ پروگرام شروع کریندے ہوئیں آکھیا جومعاشرے دے کمزور طبقیاں دے فائدے اتے حقوق دی پاسداری ریاست دی ذمہ داری ہوندی ہے۔انہاں آکھیا جو ریاست مدینہ دے وژن دی روشنی اچ صحت سہولت اتے ”احساس“ پروگرام شروع کیتے گن۔عمران خان آکھیا جو پاکستان کو ں ایجھی اسلامی فلاحی ریاست بناونڑ چاہندوں،جتھاں رحم، انسانیت اتے انصاف ہوئے۔ وزیراعظم آفس اچ صحت سہولت پروگرام جاری کرنڑ سانگے ہفتے کوں وزیراعظم ہاﺅس اچ تقریب تھئی۔ ایندے اچ وفاقی کابینہ دے ارکان، اعلیٰ حکام اتے مختلف شعبیں نال تعلق رکھنڑ آلے لوکیں شرکت کیتی۔ تقریب تلاوت کلام پاک نال شروع کیتی گی ۔ایںموقع تے صحت انصاف کارڈ دے ذریعے معاشرے دے کمزور طبقیاں کوں ڈتی گی صحت سہولتاں بارے دستاویزی فلم وی ڈکھائی گی۔ وزیراعظم عمران خان خصوصی لوکیں کوں صحت سہولت کارڈ ونڈے۔ بعد اچ وزیراعظم عمران خان تقریب توں خطاب کریندے ہوئیں آکھیا جو پاکستان مدینہ دی ریاست آلی کار اسلامی فلاحی ریاسست بنڑاونڑ چاہندوں ،جتھاںمعاشرے دے کمزور طبقیاں دی مدد اتے انہاں سانگے مواقع پیدا کرنڑ ریاست دی ذمہ داری ہوندی ہے۔ وزیراعظم عمران خان آکھیا جو معاشی مشکلاں دے باوجود احساس پروگرام کیتے 200 ارب روپے رکھے گن ۔ انہاں آکھیا جو 48 ضلعیاں اچ غربت دی لکیر توں تلے زندگی گزارن آلے سارے خاندان صحت سہولت کارڈ دی مدد نال علاج کرا سگسن۔ تھرپارکر دے سارے خانداناں کوں صحت سہولت کارڈدی سہولت ملسی۔ انہاں آکھیا جو اساں صحت خدمات کوں ہر شہری دا بنیادی حق سمجھدوں۔ ایں موقع تے ڈاکٹر ثانیہ نشترآکھیا جو معذور لوکیں سانگے سرکاری ملازمتاں اچ ڈو فیصد کوٹے تے سختی نال عملدرآمد کیتا ویندا پئے۔ انہاں آکھیا جو خصوصی بندیاں کیتے سرکاری رہائشاں اچ ہک فیصد کوٹہ رکھیا گئے۔ وزیراعظم احساس پروگرام دے پنج نکات دی منظوری ڈے ڈتی ہے۔ پروگرام تحت آندے چار سالاں اچ ہک کروڑ بندیاں کوں سماجی تحفظ ڈتا ویسی، 38 لکھ بندیاں کوں روزگار دے مواقع ملسن، ہک کروڑ خانداناں کوں صحت سہولت کارڈ ڈتے ویسن، احساس پروگرام تحت پنج لکھ طالب علماں کوں وظیفے ڈتے ویسن، سٹھ لکھ تریمتیں سانگے کفالت پروگرام شروع کیتا ویندا پئے۔