مسئلہ کشمیر حکومت دی ترجیح، حکومت ہک سال اچ محنت، دیانتداری اتے درست سمت اچ پالیسیاں شروع کیتن،نویں پاکستان اچ عوامی مفاد دا یقینی تحفظ کیتا ویسی، وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان دااجوکی حکومت دی ہک سالہ کارکردگی رپورٹ بارے تقریب نال خطاب

اسلام آباد ۔ 18 اگست (اے پی پی) وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان مسئلہ کشمیرکوں حکومت دی اولین ترجیح قرارڈیندے آکھیے جو مسئلہ کشمیردے قومی ایجنڈے تے سارے ہک مٹھ ہیں،اج دا ڈینہہ مظلوم کشمیریاں دے ناں کریندے ہیں،ساڈی حکومت ہک سال اچ محنت، دیانتداری اتے درست سمت اچ پالیسیاں شروع کیتن،نویں پاکستان اچ عوامی مفاد دا یقینی تحفظ کیتا ویسی، حکومت دا پہلا سال استحکام پاکستان اتے آندا سال تعمیر پاکستان داہوسی،وزیراعظم اصلاحات دی آپ نگرانی کریندے پین۔اے گالھ وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان اجوکی حکومت دی ہک سالہ کارکردگی رپورٹ بارے تقریب نال خطاب اچ آکھی۔انہاں آکھیا جو بھارت دے مکروہ عمل اتے سیاہ اقدامات نال پوری مقبوضہ وادی جیل میںاچ بدل گئی اے کشمیر اچ معصوم بال کھیے اتے بیمار دوائیاں کوں ترس گین،اپنڑے حق کیتے الاونڑ آلیاں کوں بھارتی مقبوضہ افواج بدترین ریاستی دہشت گردی دا نشانہ بنڑیندے پین،جیویں حکومت مسئلہ کشمیر کواجاگر کیتے ایندی مثال نئیں ملدی،میڈیا دی آزادی اتے مثبت تنقید کوں ست بسم اللہ آکھسوں کیوں جو حکومت آزادی اظہار رائے تے مکمل یقین رکھدی اے، حکومت دیاں چنگیان پالیسیان دا اثر عوام دی ترقی و خوشحالی دی شکل اچ نظر آسی،وزیراعظم عمران خان محنت اتے عزم نال قائداعظم دے پاکستان کوں اگو تے گھدی ویندن،ملک دے متوسط طبقے کیتے احساس پروگرام چنگے ہین،خزانہ و اقتصادی امور ڈویژن، وزارت توانائی اتے ریلوے دی کارکردگی چنگی تھئی اے،پاکستان پوسٹ ، این ایچ اے منافع بخش بنڑ گین،سیاحت دے ودھارے،آسان ویزہ پالیسی ،ایف بی آر دے ٹیکس دائرہ کارکیتے اقدامات تھین،پی ٹی وی خسارے توں نکل تے منافع بخش بنڑ گئے ریڈیو اتے اے پی پی کوں وی بیا فعال بنڑیندے پئے ہیں۔انہاں آکھیئے جو ہک سال دی حکومتی کارکردگی عوام اتے میڈیا دے اگو رکھ ڈتی اے تاں جو حقائق ہر کہیں کوں ڈسن،وزیراعظم دا خطاب مسلہ کشمیر پاروں ملتوی کر ڈتا گئے کیوں جو ایندے اچ صرف مسائل اتے اوکھ دا ذکر ہا،کشمیر کاز ہک وڈے مقصد کیتے سیاسی معاملات ہک پاسو رکھ تے قومی بیانیہ اتے مفاداگو تے ودھاونڑ دا فیصلہ کیتا گئے۔