امتیازی سلوک، مذہب اتے عقیدت تے مبنی تشدد دے واقعات ودھدے پن، مذہب دا دہشت گردی نال کوئی تعلق کائنی، دنیا کوں اسلام توں متعلق مسلماناں دی حساسیت اتے حضرت محمد دی تعلیمات کوں سمجھنڑ چاہیدے ، کہیں وی طبقے دی محرومی شدت پسندی کوں پیدا کریندی ہے،ساری دنیا دی کمیونٹیز وچال عظیم مفاہمت اتے برداشت کوں ودھارا ڈیونڑ دی ضرورت ہے،نائن الیون دے بعد دہشت گردی کوں مسلماناں دے نال جوڑ ڈتا گیا،مغربی عوام کوں پتہ ہی کائنی جو مسلمان پیغمبر اسلام حضرت محمد نال کتنی عقیدت رکھیندن، مسلمان رہنما مغربی معاشراں تے واضح نی کر سگے جو توہین رسالتﷺ نال اساکوں کتنا ڈکھ تھیندے وزیراعظم عمران خان دا نفرت انگیز بیانیے نال نبڑن بارے کانفرنس توں خطاب

نیویارک ۔25 ستمبر (اے پی پی)وزیراعظم عمران خان نفرت انگیز تقریراں، اسلام فوبیا دے خلاف موثر اقدامات تے زور ڈیندے ہوئیں آکھیے جو ایجھے واقعات کوں روکنڑ سانگے انہاں دی وجوہات دا حل کڈھنڑ پوسی۔ ایہ گالھ عمران خان بدھ کوں پاکستان اتے ترکی دے زیراہتمام نفرت انگیز بیانیے نال نبڑن سانگے کانفرنس توں خطاب کریندے ہوئیں آکھی۔ وزیراعظم آفس دے میڈیا ونگ توں جاری بیان مطابق وزیراعظم آکھیے جو امتیازی سلوک، مذہب اتے عقیدت تے مبنی تشدد دے واقعات ودھدے پن، مذہب دا دہشت گردی نال کوئی تعلق کائنی۔انہاں آکھیا جو دنیا کوں اسلام توں متعلق مسلماناں دی حساسیت اتے حضرت محمد دی تعلیمات کوں سمجھنڑ چاہیدے ، کہیں وی طبقے دی محرومی شدت پسندی کوں پیدا کریندی ہے۔عمران خان آکھیا جوساری دنیا دی کمیونٹیز وچال عظیم مفاہمت اتے برداشت کوں ودھارا ڈیونڑ دی ضرورت ہے۔انہاں آکھیا جونائن الیون دے بعد دہشت گردی کوں مسلماناں دے ناں نال جوڑ ڈتا گیا، نائن الیون توں پہلے 75 فیصد خودکش حملے تامل ٹائیگر کریندے ہن،جیرھے جو ہندو ہن، کہیں وی ہندو مذہب کوں دہشت گردی نال نی جوڑیا۔ انہاں آکھیا جو ایں توں پہلے جاپان دے فوجیاں وی ڈوجھی جنگ عظیم اچ خود کش حملے کیتے ہن ۔ انہاں آکھیا جو نیوزی لینڈ مسیت اچ مسلماناں کوں قتل کیتا گیا لیکن ایندا مذہب نال تعلق نی جوڑیا گیا۔انہاں آکھیا جومغربی عوام کوں پتہ ہی کائنی جو مسلمان پیغمبر اسلام حضرت محمد نال کتنی عقیدت رکھیندن۔ انہاں آکھیا جو مسلمان رہنما مغربی معاشراں تے واضح نی کر سگے جو توہین رسالتﷺ نال اساکوں کتنا ڈکھ تھیندے۔ انہاں آکھیا جو مقبوضہ کشمیر کو ںبھارت وڈی جیل اچ بدل ڈتے ، اساکوں مقبوضہ کشمیر اچ خونریزی دا ڈر ہے۔ ایں موقع تے وزیراعظم پاکستان دے زلزلہ متاثرہ علاقیاں اچ قیمتی جاناں دے ضیان تے ڈکھ دا اظہار وی کیتا۔