وزیراعظم عمران خان دی صدارت اچ معاشی ٹیم دا اجلاس، چھوٹی اتے درمیانی صنعتاں دے ودھارے، بیمار صنعتاں دی بحالی اتے تعمیرات سیکٹر کوں مراعات ڈیونڑ بارے تفصیلی گالھ مہاڑ کیتی گی اساڈی پہلی ترجیح معاشی نظام کوں مستحکم بنیادیں تے چلاونڑ ہے جیندے نتیجے اچ روزگار دے مواقع ملسن، سرمایہ کاراں دا اعتماد ودھسی اتے مقامی صنعتاں ودھسن، وزیراعظم عمران خان دا اجلاس توں خطاب

اسلام آباد ۔ 10 اکتوبر (اے پی پی) وزیراعظم عمران خان دی صدارت اچ معاشی ٹیم دا اجلاس خمیس کوں تھیا ۔ اجلاس اچ وفاقی وزریر مخدوم خسرو بختیار، عمر ایوب، حماد اظہر، محمد میاں سومرو، مشیر خزانہ ڈاکٹر عبدالحفیظ شیخ، مشیر تجارت عبدالرزاق داود، مشیر اصلاحات ڈاکٹر عشرت حسین، معاونین خصوصی ڈاکٹر فردوس عاشق اعوان، یوسف بیگ مرزا، شوکت ترین، چیئرمین ایف بی آر شبر زیدی، چیرمین سرمایہ کاری بورڈ، چیئرمین این ڈی ایم اے اتے سینئر افسروی موجود ہن۔ اجلاس توں خطاب کریندے ہوئیں وزیر اعظم آکھیا جو اساڈی حکومت دی پہلی ترجیح معاشی نظام کوں مستحکم بنیادیں تے چلاونڑ ہے ،جیندے نتیجے اچ روزگار دے مواقع ملسن اتے سرمایہ کاراں دا اعتماد ودھسی،انہاں آکھیا جو ایں عمل نال مقامی صنعتاں وی ودھسن۔ایں موقع تے چھوٹی اتے درمیانی صنعتاں دے ودھارے اتے بیمار صنعتاں دی بحالی سمیت تعمیرات سیکٹر کوں مراعات ڈیونڑ بارے تفصیلی گالھ مہاڑ کیتی گی۔ وزیر اعظم ہدایت کیتی جو ہک ہفتے اچ ایس ایم ایز دے ودھارے سانگے مکمل ایکشن پلان پیش کیتا ونجے ،جیندے اچ مختلف ٹارگٹ مکمل کرنڑ سانگے خاص میعاد دا تعین شامل ہوئے۔ سٹیل اتے سیمنٹ صنعتاں دے سیلز ٹیکس بارے وزیر اعظم مشیر خزانہ کوں ہدایت کیتی جوا وہ ایف بی آر، نواں پاکستان ہاوسنگ اتھارٹی اتے صوبائی حکومتاں دے نال رل مل تے لائحہ عمل تیار کرنڑ اتے اگلے ہفتے تئیں رپورٹ پیش کرنڑ۔ وزیر اعظم ایں گالھ تے زور ڈتا جو معاشی ٹیم دے نال مسلسل اجلاس کیتے ویسن جیندا مقصد بین الوزارتی ہم آہنگی ودھاونڑ ہے۔