سرمایہ کاری دے بغیر ملک اگی تے نی ودھ سگدا ، ترقی کیتے صنعتاں قائم کرنڑ ، برآمدات ودھاونڑ ، زرعی پیداوار اچ ودھارے ، سیاحت دے ودھارے تے فنی تعلیم و تربیت تے توجہ ڈیونڑیں ہوسی ، وزیر اعظم عمران خان دا علامہ اقبال انڈسٹریل سٹیٹ دے سنگ بنیاد دی تقریب نال خطاب

فیصل آباد ۔ 3 جنوری (اے پی پی) وزیر اعظم عمران خان آکھیے جو سرمایہ کاری دے بغیر ملک اگی تے نی ودھ سگدا ، ترقی کیتے صنعتاں قائم کرنڑ ، برآمدات ودھاونڑ ، زرعی پیداوار اچ ودھارے ، سیاحت دے ودھارے تے فنی تعلیم و تربیت تے توجہ ڈیونڑیں ہوسی، سرمایہ کار پاکستان اچ سرمایہ کاری کیتے تیار ہن ، انہاں کوں مناسب ماحول ڈتا ویندا پئے ،غربت اچ کمی کیتے چین دے اقدامات اساں کیتے مثال ہن ، نیب قوانین اچ تبدیلی دے بعد بیورو کریسی ڈے ہنڑ کوئی بہانہ کائنی ، کم تکھے کرنڑاں ہوسی ، پنجاب اچ کوئی رسہ گیر ، قاتل ڈاکو مافیا نظر نی آونڑاں چاہیدا ، سپیشل اکنامک زونز تے کم تکھے پورا کیتا ونجے ۔ اے گال انہاں جمعے کوں اتھاں علامہ اقبال انڈسٹریل سٹیٹ دے منڈھ بدھنڑ دی تقریب نال خطاب کریندے ہوئیں آکھی اے ۔ وزیراعظم آکھیا جو خصوصی اقتصادی زون ترقی دے پاسے ہک اہم قدم اے ۔ سپیشل اکنامک زونز دا قیام پاکستان کیتے اساڈے وژن دا عکاس اے ۔ اساں پاکستان کوں ریاست مدینہ دی طرز تے تعمیر کرنڑ چاہندون ۔ جیں دی ترجیح غریب طبقے کوں اتے گھن آونڑ تے ایجھی ریاست قائم کرنڑ اے جتھاں انسانیت ، رحم ، انصاف، قانون دی بالا دستی اتے کمزور طبقے کوں تحفظ حاصل ہووے کیوں جو اے چیزاں انساناں دے معاشرے کوں زناوراں دے معاشرے نال ممتاز کریندین ۔ انہاں آکھیا جو ریاست کمزور طبقے دی فلاح ذمہ وار اے ۔ انہاں آکھیے جو ہر تقریب اچ اے گال کرنڑ چاہنداں انگزیری دا بے موقع استعال غلامانہ ذہن دا عکاس اے۔ پوری دنیا اچ اپنڑی قومی زباناں کوں ترجیح ڈتی ویندی اے ۔ اسمبلی اچ انگریزی اچ تقریراں کیتیاں ویندن ۔ اساکوں آزاد تھئے72 سال تھی گن لیکن مائنڈ سیٹ اپ تبدیل کائنی تھیا ۔ اساکوں انگریزی کوں اعلیٰ تعلیم کیتے استعمال کرنڑاں چاہیدے لیکن اساں لوکاں دے سامنڑے جنہاں کوں انگریزی نی آندی بول تے انہاں دی توہین کریندوں ۔