جنرل قاسم سلیمانی دا قتل سنجیدہ معاملہ اے، پورے پاکستان کوں ایں واقعے تے تشویش اے ، افغان امن عمل متاثر تھی سگدے ،اے خطہ کہیں نویں جنگ دا متحمل نی تھی سگدا ، پاکستان دی سرزمین کہیں ڈوجھے ملک دے خلاف استعمال کائناں تھیسی ، وزیر خارجہ شاہ محمود قریشی دا سینیٹ اچ پالیسی بیان

اسلام آباد ۔ 6 جنوری (اے پی پی) وزیر خارجہ شاہ محمود قریشی آکھیے جو جنرل قاسم سلیمانی دا قتل سنجیدہ معاملہ اے، پورے پاکستان کوں ایں واقعے تے تشویش اے ، ایں واقعے نال خطہ مزید عدم استحکام دا شکار تھئے ، عراق اتے شام اچ عدم استحکام دا امکان ودھ گے ،افغان امن عمل متاثر تھی سگدے ،اجوکے واقعے تے پاکستان دے موقف اچ کوئی ابہام کائنی ، پاکستان کہیں ہک پاسے اقدام دی حمایت کائنی کریندا ،طاقت دا استعمال کہیں مسئلے دا حل کائنی ، ایں معاملے کوں سفارتی طریقہ کار تے عالمی قوانین دے مطابق حل کیتا ونجے ، اے خطہ کہیں نویں جنگ دا متحمل نی تھی سگدا ، جنگ دے پاکستان سمیت پورے خطے تے ڈراونڑیں اثرات تھیسن ، پاکستان دی سرزمین کہیں ڈوجھے ملک دے خلاف استعمال کائناں تھیسی ، پاکستان کہیں علاقائی جھیڑے دا حصہ دار کائناں بنڑسی ۔سنوار کوں سینیٹ دے اجلاس اچ وزیر خارجہ شاہ محمود قریشی پالیسی بیان ڈیندے ہوئیں آکھیے جو اے خطہ بہوں عرصے توں جھیڑے تے عدم استحکام دا شکار رہیے ایندی بنیادی وجہ اے ہے جو خطے اچ بہوں سارے مسئلے حل طلب ہن ، انہاں دے حل تے توجہ کائنی ڈتی گی جیں نال مسئلے ودھ گن ، ایںتناظر اچ حالات نال نویں تناﺅ تے جھیڑے جنم گھدے ۔ انہاں آکھیا جو27 دسمبر کوں عراق دے بیس تے راکٹ حملے اچ ہک امریکی کنٹریکٹر ہلاک تھیا تے امریکی عملے دے ڈو اہلکار زخمی تھے ، 29 دسمبر کوں امریکی ردعمل اچ امریکیاں تے حملے کرنڑ آلی ملیشیاءدے 25 بندے جاں بحق اتے 25 توں ودھ زخمی تھن جیں دے بعد بغداد اچ امریکی سفارت خانے دے سامنڑے احتجاج کیتا گیا ، یکم جنوری 2020ءکوں امریکہ ایں احتجاج دا ذمے وار ایران کوں آکھیا تے ایرانی جنرل قاسم سلیمانی کوں ایں واقعے دا منصوبہ ساز تے ماسٹر مائنڈ قرار ڈتا۔ 3 جنوری کوں جنرل قاسم سلیمانی تے ڈرون حملہ کیتا گیا جیں اچ انہاں سمیت عراق دی مقامی ملیشیاءدے ڈپٹی کمانڈر ابومہدی المہندس اتے بئے 9 بندے جاں بحق تھن ۔ وزیر خارجہ آکھیا جو اے تشویشناک صورتحال اے، ماہرین اکھیندے پن جو 2011 اچ اسامہ تے حملے تے 2019تے داعش دے سربراہ ابوبکر البغدادی تے حملے توں وی ودھ ایں واقعے دے سنگین اثرات ہوسن ،امریکی ڈورن حملے دے بعد عراق تے ایران اچ لوک سڑکاں تے نکل تے احتجاج کریندے پن ،ایران دی حکومت سلامتی کونسل دا ہنگامی اجلاس سڈےے ، عراق اچ عوامی ردعمل سامنڑے آئے ،ہفتے کوں قاسم سلیمانی دی نماز جنازہ اچ وڈی تعداد اچ عوام شرکت کتے ردعمل ڈتا ۔ اتوار کوں عراقی پارلیمنٹ دا ہنگامی اجلاس تھیا، ایں صورتحال دے تناظر اچ عراقی پارلیمنٹ ہک قرارداد منظور کیتی جیں اچ اے آکھیا گیا جو عراق اچ موجود غیر ملکی فوجیاں کوں عراقی سرزمین چھوڑ ڈیونڑیں چاہیدی اے ۔ قرارداد اچ اے وی آکھیا گے جو عراق دے وزیر خارجہ کوں اقوام متحدہ اچ ونج تے امریکی حملے دے خلاف احتجاج ریکارڈ کراونڑاں چاہیدے کیوں جو اے حملہ اقوام متحدہ دے منشور تے قرارداداں دے خلاف اے ، شاہ محمود قریشی آکھیا جو وقت ڈسیسی جو اے صورت حال کیا رخ اختیار کریندی اے ۔ اتوار کوں خطے دے اہم وزرائے خارجہ نال رابطے کیتے ، ایران دے وزیر خارجہ نال تفصیلی گال مہاڑ کیتی، انہاں دا نکتہ نظر سنڑیا تے پاکستان دے موقف دا ڈسایا ۔ متحدہ عرب امارات، ترکی اتے سعودی عرب دے وزراءخارجہ نال وی گال مہاڑ کیتی خطے دے بئے ملکاں نال وی رابطے کریسوں، چین نال رابطے اچ ہوں ، انہاں آکھیا جو مشرق وسطیٰ دی صورتحال نازک اتے تشویشناک اے ۔ ایران دے سپریم لیڈر آیت اللہ خامنہ ای برملا انتقام دا اظہار کر چکن ، پوری ایرانی قوم ایں معاملے تے کاوڑ اچ ہے جڈاں جو امریکہ وی مسلسل ایران دے ردعمل دی صورت اچ سخت جوابی کارروائی دیاں تڑیاں ڈیندا کھڑے جیں پاروں خطے دی صورت حال اچ مزید جھیڑے د ڈر اے ، اقوام متحدہ دے سیکرٹری جنرل فریقین کوں صبر کرنڑ دا اکھیندے پن ۔