حکومت ہر ویلھے عوام کیتے سوچیندی اے ، کھرباں روپے دا پیکیج وزیراعظم عمران خان دے اپنڑی قوم تے غریب عوام کیتے احساس دی جھلک اے ، ڈاکٹر فردوس عاشق اعوان

اسلام آباد ۔ 25 مارچ (اے پی پی) وزیراعظم دی معاون خصوصی اطلاعات و نشریات ڈاکٹر فردوس عاشق اعوان آکھیے جو وزیراعظم عمران خان دی حکومت ہر ویلھے عوام کیتے سوچیندی اے ، ملک تے قوم دی فلاح و بہبود اتے انہاں دی بہتری ہی اساڈا مقصد اے ، وزیراعظم عمران خان کورونا دے چیلنج نال نبڑنڑ کیتے جامع قومی حکمت عملی دا اعلان کیتے ،کھرباں روپے دا پیکیج عمران خان دے اپنڑی قوم اتے غریب عوام کیتے احساس دی جھلک اے ، وزیراعظم معاشرے دے سارے طبقیں کوں سامنڑے رکھیندے ہوئیں قدم چاتے ، معاشی حقائق اتے قوم کوں پیش آندے مسلیں کوں سامنڑے رکھیندے ہوئیں اے بہوں بہترین پیکیج اے ۔ بدھ کوں وزیراعظم دی معاون خصوصی اطلاعات و نشریات ڈاکٹر فردوس عاشق اپنڑے ٹویٹ اچ آکھیے جو مزدور طبقے کیتے 200 ارب اتے معاشرے دے بہوں غریب لوکاں کیتے 150 ارب دی رقم رکھی گی اے، برآمد کنندگان کوں 100 ارب روپے دا وختی ریفنڈ ڈیونڑ نال برآمد کنندگان دی مدد ہوسی اتے ایندے نال ملکی معیشت تے چنگے اثرات تھیسن ۔ چھوٹیاں وڈیاں صنعتاں تے زراعت کیتے 100 ارب نال پیداواری صلاحیت ودھاونڑ اچ مدد ملسی ، یوٹیلٹی سٹورز کیتے 50 ارب روپے دی رقم دا مقصد عوام کوں سستی اتے معیاری چیزاں دی فراہمی یقینی بنڑاونڑاں اے ۔انہاں آکھیے جولاک ڈاون دی صورتحال کیتے100 ارب تے کنڑنک دی سرکاری خریداری کیتے 280 ارب روپے رکھیے گن ۔ انہاں آکھیے جو پٹرولیم مصنوعات تے15روپے فی لیٹرگھٹ کرڈتن ، انہاں سارے اقدامات نال واضح تھیندے جو وزیراعظم عمران خان دی حکومت ہر ویلھے عوام کیتے سوچیندی اے ،ملک تے قوم دی فلاح بہبود تے انہاں دی بہتری ہی اساڈا مقصد اے ۔