پاک نبی صلی اللہ و علیہ وآلہٰ وسلم خاتم النین دا ڄیوݨ سارے ڄگ کیتے مثال اتے سوڄھلا اے، انسانیت نال محبت، امن، رواداری، بھرا بھرپی اتے ہر کہیں دے حقوق دا خیال اتے ہر اوکھے سوکھے ویلھے ہک ٻئے دا ہتھ ونݙاوݨ انہاں دی تعلیمات اتے سنت ہین، صدر مملکت ݙاکٹر عارف علوی دا رحمت اللعالمین کانفرنس نال خطاب

لاہور۔16نومبر(اے پی پی) صدر مملکت ݙاکٹر عارف علوی آکھیے جو پاک نبی صلی اللہ و علیہ وآلہٰ وسلم خاتم النین دا ڄیوݨ سارے ڄگ کیتے مثال اتے سوڄھلا اے، انسانیت نال محبت، امن، رواداری، بھرا بھرپی اتے ہر کہیں دے حقوق دا خیال اتے ہر اوکھے سوکھے ویلھے ہک ٻئے دا ہتھ ونݙاوݨ انہاں دی تعلیمات اتے سنت ہین، حڄور دی اسوہ حسنہ ساݙے جیوݨ دا اصول ہین، ریاست مدینہ ایہو اے جو لوکاں کوں انصاف، برابری اتے انہاں دا احساس کیتا ونڄے، ایندے کیتے معاشرے کوں آپ کوشش کرݨی ہوسی۔ صدر مملکت آکھیے جو وزیراعظم عمران خان جیویں ناموس رسالت بارے موقف اپنائے اتے ڄڳ اچ پیش کیتے ایندی مثال نئیں ملدی، ناموس رسالت کیتے ہر سطح تے کوشش کرݨی ہوسی،کوشش اے جو ایں ساڳے پوپ نال کوئی مذاکرہ رکھیا ونڄے اتے انہاں کوں ساݙے کیتے نبی پاک دی اہمیت اتے محبت دا ݙسایا ونڄے تاں جو اڳو تے اینجھین سنگین صورتحال توں بچیا ونڄ سگے۔ انہاں آکھیے جو ملک اچ کرونا دی ݙوجھی لھر تیزی نال آندی پئی اے جیندے توں بچنݨ کیتے اڳیں آلی کار ڄزبے، احتیاط اتے ایس او پیز تے عملدرآمد دی لوڑھ اے، لوک ودھ توں ودھ سماجی فاصلہ رکھین۔ انہاں آکھیے جو حکومت کرونا توں بچݨ کیتے ہر اقدام کریسی، لوکاں دا تحفظ، جیوݨ دی گذران کیتے کوششاں اتے ملکی معیشت دا پہیہ چلاوݨ کیتے ودھ کوشش کیتی ویسی ایندے کیتے مختلف پالیسیاں تے عملدراآمد جاری اے۔