اسلام آباد۔9ستمبر (اے پی پی):وفاقی وزیر خزانہ شوکت ترین آکھیے جو ملک اچ جی ڈی پی گروتھ 4 فیصد تئیں رہی تے اڄوکے سال اینکوں 4.8 فیصد تے گھن ویسوں ، اساݙی معیشت اچ بہتری آندی پئی اے جیں دی وڄہ توں گروتھ ودھ ویسی، افغانستان دے نال تجارت پاکستانی روپے اچ تھیسی ، افغانستان دے معاملے تے روزانہ دی بنیاد جائزہ ڳھدا ویندے ، افغانستان دے 9 ارب ڈالر عالمی مالیاتی اداریں دی طرفوں روکیے ڳئن ، اے ڳال انہاں خمیس کوں سینیٹ کمیٹی خزانہ کوں بریفنگ ݙیندے ہوئیں آکھی اے ۔وفاقی وزیر آکھیے جو ایف بی آر نوٹسز دا سلسلہ روک ݙتا ڳئے اسں کنے ݙڈھ کروڑ لوکاں دا ڈیٹا موجود اے جیڑھے سیلز ٹیکس ݙے سڳدن ، اے ڈیٹا نادرا توں ڳھدا ڳئے تے انہاں کوں ھک سنھیا ݙتا ویسی جے او سنھیے تے جواب ݙیندن تاں ٹھیک نتاں قانونی کاروائی تھیسی ، شوکت ترین آکھیے جو ایکسچینج ریٹ ایں ویلھے جتھاں موجود اے ایں جاہ تے تھیوݨ دا ہدف ہئی ، ایکسچینج ریٹ کوں مصنوعی طور تے گھٹ کرݨ توں ضیان تھیندے ، ایکسچینج ریٹ دا فیصلہ سٹیٹ بینک کرݨا اے ۔ انہاں آکھیے جو کامیاب پاکستان پروگرام جلدی شروع کیتا ویسی ، پہلے مرحلے وچ خیبرپختونخوا اتے بلوچستان اچ کامیاب پاکستان پروگرام شروع کیتا ویسی اساں غریباں کیتے اے پروگرام شروع کریسوں ، پورے پاکستان اچ کامیاب پاکستان پروگرام شروع کرݨ حالی ممکن کائنی انہاں آکھیے جو افغانستان دے مالی ذخائر کوں دنیادے کئی ملکاں منجمد کیتے ۔ افغانستان دے حوالے نال ھک سوال دے ولدے اچ انہاں آکھیے جو افغانستان دے نال تجارت پاکستانی روپے وچ تھیسی کجھ ہفتے اچ پتہ لڳسی جو افغانستان دے نال تجارت تے کیا اثرات ہوسن، افغانستان دی موجودہ صورتحال اچ معمولات چلاوݨ کیتے اتھوں افرادی قوت دی فراہمی دی صورت اچ معاونت کیتی ونڄ سڳدی اے اکتوبر اچ کمیٹی کوں پہلی ترائے مہینے دی کارکردگی بارے بریفنگ ݙیساں۔
