بھارت دا جارحانہ رویہ اتے ہندوتوا نظریہ دا غلبہ علاقائی امن کیتے خطرہ اے، افغانستان اچ امن تے سلامتی کیتے تعاون پاکستان اتے چین دے آپسی فائدے اچ اے، دنیا ہݨ ہک بئی سرد جنگ نی سہہ سڳدی، وزیراعظم عمران خان دا چین اچ اجلاس توں خطاب

بیجنگ۔4فروری (اے پی پی) وزیراعظم عمران خان آکھیا جو بھارت دا جارحانہ رویہ اتے ہندوتوا نظریہ دا غلبہ علاقائی امن کیتے خطرہ اے، افغانستان اچ امن تے سلامتی کیتے تعاون پاکستان اتے چین دے آپسی فائدے اچ اے، دنیا ہݨ ہک بئی سرد جنگ نی سہہ سڳدی۔ جمعے کوں وزیراعظم آفس دے میڈیا ونگ توں جاری بیان دے مطابق چین دے دورہ اچ وزیراعظم عمران خان چین دے معروف تھنک ٹینکس ، یونیورسٹیاں اتے پاکستان سٹڈیز سنٹرز دے سربراہواں اتے نمائندیاں نال خصوصی اجلاس کیتا۔ اجلاس اچ وزیراعظم پاک چین تعلقات دی اہمیت اتے علاقائی استحکام تے خوشحالی کوں یقینی ٻݨاوݨ تے زور ݙتا۔ انہاں کثیر الجہتی فورمز تے پاک چین سانجھے موقف کوں اجاگر کریندیں ہوئیں ون چائنہ پالیسی اتے بنیادی فائدے اتے پاکستان دے پکے عزم دا اعادہ کیتا۔ وزیراعظم کشمیر دے تنازعے تے چین دی حمایت تے شکریہ ادا کیتا۔ اجلاس اچ وزیراعظم علاقائی استحکام اتے خوشحالی کوں یقینی ٻݨاوݨ اچ پاک چین تعلقات دی اہمیت تے زور ݙتا۔ وزیراعظم چین نال پاکستان دی سدابہار سانجھے داری دا اعادہ کریندیں ہوئیں صدر شی جن پنگ دے بیلٹ اینڈ روڈ انیشیٹو دے ہک اہم منصوبے دے طور تے سی پیک دی اہمیت کوں اجاگر کیتا۔ اجلاس اچ وزیر خارجہ مخدوم شاہ محمود قریشی، وزیر خزانہ شوکت فیاض ترین، وزیر اطلاعات تے نشریات چوہدری فواد حسین، وزیر منصوبہ بندی ترقی، اصلاحات تے خصوصی اقدامات اسد عمر، مشیر تجارت عبدالرزاق دائود، وزیراعظم دے معاون خصوصی برائے سی پیک خالد منصور، قومی سلامتی دے مشیر ڈاکٹر معید یوسف اتے اعلیٰ حکام شریک تھیے۔