الیکشن کمیشن پنجاب اسمبلی دے تحریک انصاف دے 25 ارکان کوں ڈی سیٹ کر ݙتے

اسلام آباد۔20مئی(اے پی پی)الیکشن کمیشن پنجاب اسمبلی دے تحریک انصاف دے 25 ارکان کوں ڈی سیٹ کرݨ دا ریفرنس منظور کر ڳھدے، 5 مخصوص نشستاں تے کامیاب ارکان سودھا 25 ارکان دی اسمبلی رکنیت ختم کر ݙتی اے۔ الیکشن کمیشن پنجاب اسمبلی دے تحریک انصاف دے 25 ارکان دے خلاف سپیکر چوہدری پرویز الہٰی وکوں ٻھیڄا ڳیا ریفرنس منظور کریندے انہاں ارکان کوں ڈی سیٹ کرݙتے۔ الیکشن کمیشن دے 3 رکنی بنچ چیف الیکشن کمشنر سکندر سلطان راجہ دی سربراہی اچ فیصضہ سݨائے۔ رکنیت ونڄاوݨ آلے ارکان اچ پی پی 7 راولپنڈی دے راجہ صغیر احمد، پی پی 83 خوشاب دے ملک غلام رسول، پی پی 90 بھکر توں سعید اکبر خان، پی پی 97 فیصل آباد توں ملک اجمل، پی پی 158 لاہور دے عبدالعلیم خان، پی پی 167 لاہور دے نذیر احمد چوہان، پی پی 170 لاہور دے ملک امین ذوالقرنین، پی پی 202 ساہیوال توں ملک نعمان لنگڑیال، پی پی 217 ملتان توں محمد سلمان، پی پی 224 لودھراں دے زوار حسین وڑائچ، پی پی 228  لودھراں دے نذیر احمد خان، پی پی 237 بہاولنگر توں فدا حسین، پی پی 272 مظفر گڑھ توں زہرہ بتول، پی پی 282 لیہ توں محمد طاہر، پی پی 168 لاہور توں ملک اسد علی، پی پی 273 مظفر گڑھ محمد سبطین رضا، پی پی 288 ڈی جی خان محسن عطاء کھوسہ، پی پی 140 شیخوپورہ میاں خلیل محمود، پی پی 127 جھنگ مہر محمد اسلم، پی پی 125 جھنگ فیصل حیات، تریمتیں دی مخصوص نشستاں تے ایم پی اے عائشہ نواز، ساجدہ یوسف، عظمیٰ کار دار، اقلیتی نشست تے ایم پی اے ہارون عمران گل اتے اعجاز مسیح شامل ہین۔