اسلام آباد۔24مئی (اے پی پی):سابق وزیراعظم سینیٹر یوسف رضا گیلانی آکھیے جو عمران خان اپݨی ہار من گھنن ، آخری بال تئیں لڑݨ دے دعوے کرݨ آلے وکٹاں چا تے بھڄ ڳئن ۔ منڳل کوں سینیٹ اچ ڳالھ کریندے ہوئیں انہاں آکھیے جو اڄ قائد حزب اختلاف گرفتاریاں دی ڳالھ کریندن ، کیا انہاں کوں مریم نواز، خورشید شاہ اتے حمزہ شہباز کوں جیویں گرفتار کیتا ڳئے او بھل ڳئن ، ملتان اچ پی ڈی ایم دے جلسے اچ جیڑھیاں رکاوٹاں پاتیاں ڳئن او ساریں کوں یاد ہن ، پی ٹی آئی 120 ݙینھ دھرنا ݙتا لیکن کہیں رکاوٹاں نی پاتیاں ، پی ٹی آئی ڈکٹیٹ نی کرسڳدی جو الیکشن کݙاں کرائے ونڄن ۔ انہاں آکھیے جو سابق وزیراعظم دے خلاف عدم اعتماد دی تحریک قانون و آئین دے مطابق منظور تھئی، جیڑھے اتحادی انہاں کوں چھوڑ ڳئے انہاں کوں غدار قرار ݙیندے پئن ، عمران خان اپݨی ہار من گھنن، اڄ ڈیوڈ لو توں وی اواستعفیٰ منگدے پئن ، کل جوبائیڈن توں وی استعفیٰ منگ سڳدن ۔
