اسلام آباد۔24مئی (اے پی پی):وفاقی وزیر اطلاعات و نشریات مریم اورنگزیب آکھیے جو لاہور اچ پولیس اہلکار کمال احمد تے فائرنگ کرتے سرخ لکیر پار کیتی ڳئی ، میڈیا سیاسی سرگرمیاں دی کوریج کرے لیکن شرپسندی، تشدد اتے دہشت کھنڈاوݨ دیاں سرگرمیاں دا بائیکاٹ کرے، وزیراعظم شہبازشریف معیشت اتے عوام دی حفاظت کرݨ دے ݙو ارادے دا اظہار کرچکن ، پاکستان دی معیشت اتے عوام کوں بچاوݨ کیتے ریڈلائن لاوݨ دا ویلھا آڳئے ، معیشت دی بحالی اتے عوام دے ریلیف دے رستے اچ سرخ لکیر چھک ݙتی اے ، کہیں کوں پار کرݨ دی اجازت نہ ݙیسوں ۔ منڳل کوں آپݨے ھک بیان اچ انہاں آکھیے جو پاکستان دی معاشی خودمختاری کوں بچاوݨ دی جنگ اچ کامیابی کیتے سیاسی استحکام بنیادی لوڑھ اے ، انہاں آکھیے جو پاکستان کوں تباہ کرتے ونڄݨ آلیں کوں مزید تباہی کھنڈاوݨ دی اجازت نی ݙتی ونڄ سڳدی ۔ معیشت تے عوام دی حفاظت تے کوئی سمجھوتہ نہ کیتا ویسی ۔ وفاقی وزیر اطلاعات آکھیے جو معیشت جݙاں وی ٹیک آف کرݨ لڳدی اے ، عمران صاحب دی شرپسندی ایں رستے دی رکاوٹ بݨدی اے ۔ انہاں آکھیے جو سی پیک آیا، عظیم دوست صدر شی جن پنگ پاکستان آوݨ دا اعلان کیتا تاں دھرنے دا اعلان تھی ڳیا ہئی ۔ اڄ پاکستان دی معیشت دی بحالی اتے عوام کوں ریلیف ݙیوݨ دا آغاز کیتے ، کوئی مداخلت برداشت نہ کیتی ویسی ۔ معیشت اتے عوام دا ریلیف ھک نکاتی ایجنڈا اے، ایں تے کوئی سمجھوتہ نہ تھیسی نہ ایں تے حملہ برداشت کریسوں ۔
