اسلام آباد۔24مئی (اے پی پی) وفاقی کابینہ دا اجلاس، الیکشن ترمیمی بل 2022 قومی اسمبلی اچ پیش کرݨ، جبری گمشدگیاں تے خصوصی کمیٹی ٻݨاوݨ، ریلوے سٹیٹ ڈویلپمنٹ تے مارکیٹنگ کمپنی دی بحالی اتے چیئرمین کراچی پورٹ ٹرسٹ دی ڈیپوٹیشن تے تعیناتی منسوخ کرݨ دی منظوری ݙے ݙتی جدانجو وزیراعظم ولوں صدر کوں گورنر پنجاب تعینات کرݨ دی ایڈوائس دی توثیق کر ݙتی۔ وفاقی کابینہ دا اجلاس وزیراعظم شہباز شریف دی صدارت اچ منگل کوں تھیا۔ اجلاس اچ وزارت داخلہ کابینہ کوں اسلام آباد ہائی کورٹ دے حکم دے ماطقب جبری گمشدگیاں بارے بریفنگ ݙتی۔ اجلاس اچ کابینہ ، وزارت ریلوے دی سفارش تے ریلوے سٹیٹ ڈویلپمنٹ تے مارکیٹنگ کمپنی کوں بحال کرݨ دی منظوری ݙتی۔ اجلاس اچ کابینہ ، کمیٹی برائے قانونی اصلاحات دے تھیوݨ آلے اجلاساں اچ ڳھدے ڳئے فیصلے دی توثیق کیتی۔ اجلاس اچ کابینہ کمیٹی برائے قانونی اصلاحات دے فیصلے چارٹرڈ اکائونٹنٹس بائی لاز 1983 اچ ترامیم، قومی صنعتی روابط کمیشن اچ چیئرمین اتے ممبران دی تعیناتی رولز 2022 دی منظوری، الیکشن ترمیمی بل 2022 دی منظوری اتے قومی اسمبلی اچ پیش کرݨ دی وی منظوری ݙتی ڳئی۔ کابینہ سمندر پار پاکستانیاں کوں ملک دا قیمتی اثاثہ آکھدیں ہوئیں آکھیا جو انہاں کوں انتخابات دے عمل اچ رَلاوݨ ٻہوں ضروری اے۔ الیکشن ترمیمی بل 2022 دے اہم نکات دے مطابق َ الیکشن کمیشن سمندر پار پاکستانیاں کیتے ضمنی انتخابات اچ ووٹ پاوݨ کیتے پائلٹ پراجیکٹ دا اجراء کرے۔ پراجیکٹ دے نتیجے دی رپورٹ پارلیمان اچ پیش کیتی ونڄے جئیں دے بعد فیصلہ کیتا ویسی جو اے قابل عمل ہے یا کائنا۔ کابینہ ، وزیر اعظم ولوں صدر پاکستان کوں گورنر پنجاب تعینات کرݨ دی ایڈوائس دی وی توثیق کیتی۔ کابینہ وزیراعظم ولوں صدر کوں ٻئے معاملیاں تے ݙتی ڳئی ایڈوائسز تے وی تفصیلی بحث کیتی۔
