یوم تکبیر آپݨی آزادی، خودمختاری تے دفاع تے سمجھوتہ نہ کرݨ دے واضح اظہار دا تاریخی ݙینھ اے ، وزیراعظم

اسلام آباد۔28مئی (اے پی پی):وزیراعظم شہبازشریف آکھیے جو 28 مئی 1998 کوں بلوچستان، چاغی دے پہاڑاں اچ بلند تھیوݨ آلی نعرہ تکبیر دی گونج اڄ وی جاری اے ، اے پاکستان دا اپݨی آزادی، خودمختاری اتے دفاع تے سمجھوتہ نہ کرݨ دے واضح اظہار دا تاریخی ݙینھ اے ، اڄ دا ݙینھ پاکستان دے اتحاد، یک جہتی اتے ھک تھیوݨ دا ݙینھ اے ، ایہااتحاد پاکستان دی اصل طاقت اے ، ایں عہد دی تجدید کریندوں جو پاکستان دے دفاع، سلامتی اتے قومی مفادات کیتے کہیں وی قربانی توں دریغ نہ کریسوں ۔ پاکستان دے جوہری دھماکیں دی سلور جوبلی تے قوم کوں مبارخ ݙیندے ہوئیں وزیراعظم آکھیے جو 28 مئی 1998 کوں بلوچستان، چاغی دے پہاڑاں اچ بلند تھیوݨ آلے نعرہ تکبیر گونج اڄ وی جاری اے ۔ دفاع پاکستان دا اے تمغہ بلوچستان دی دھرتی دے سینے تے سجیے ۔ اے پاکستان دا اپݨی آزادی، خودمختاری اتے دفاع تے سمجھوتہ نہ کرݨ دے واضح اظہار دا تاریخی ݙینھ اے۔ وزیراعظم آکھیے جو پاکستان دے جوہری پروگرام دے معمار شہید ذوالفقار علی بھٹو کوں خراج عقیدت پیش کریندوں ۔ پاکستان دا سرفخر توں اچا کرݨ آلے عظیم محب وطن وزیراعظم نوازشریف کوں خراج تحسین پیش کریندوں ۔ قائد محمد نوازشریف ہر لالچ ، ہر دٻاؤ مسترد کرتے پاکستان کوں دنیا دی ستویں تے اسلامی دنیا دی پہلی ایٹمی قوت بݨایا ۔ ذوالفقار علی بھٹو نال وزیراعظم نوازشریف تئیں ساریاں حکومتاں تے جوہری پروگرام متعلق سارے ذمے واراں کوں سلام پیش کریندن ۔ وزیراعظم آکھیے جو ساݙے سائنسدان، انجینئرز اتے جوہری پروگرام کوں پروان چڑھاوݨ آلا ہر فرد لائق تحسین اے، اے قوم دے ہیروز ہن ۔ ساݙی مسلح افواج جوہری پروگرام کیتے جیڑھی خدمات انجام ݙتن او تاریخ دا سنہری باب اے ۔