اسلام آباد۔30مئی(اے پی پی)صدر مملکت ڈاکٹر عارف علوی فیڈرل بورڈ آف ریونیو (ایف بی آر) کوں ہدایت کیتی اے جو او ایف بی آر شوگر ملاں توں ودھ کھنݙ ڳھنݨ آلے غیر رجسٹرڈ ہول سیلرز، ڈیلرز و ڈسٹری بیوٹرز کوں ٹیکس نیٹ اچ رلا تے ٹیکس ادائیگی ودھاوݨ کیتے محتسب دی سفارشات تے عمل کرے۔ صدر مملکت اے ہدایات وفاقی ٹیکس محتسب دے احکامات دے خلاف ایف بی آر ولوں دائر 25 ہکو جھیاں درخواستاں نمٹیندے ݙتن۔ انہاں آکھیا جو بھاری مالیاتی لین دین کرݨ اتے ایف بی آر نال ڈیٹا دی دستیابی دے باوجود کھنݙ دے غیر رجسٹرڈ خریدار یا تاں ٹیکس نیٹ توں باہرو رہین یا ٹیکس دی ادائیگی توں بچݨ دی کوشش کریندن، انہاں کوں ریگولر کیتا ونڄے۔
