اسلام آباد۔31مئی (اے پی پی) پاکستان یوکرین دی درخواست تے امدادی سامان دی ݙوجھی کھیپ روانہ کر ݙتی، سی ۔130طیارہ 7.5 ٹن توں ودھ امدادی سامان گھن تے روانہ تھیا جݙاں جو مزید 7.5 ٹن امدادی سامان 3 جون کوں روانہ کیتا ویسی ۔ تفصیل موجب یوکرین دی درخواست تے حکومت پاکستان یوکرین دے لوکاں کیتے انسانی امداد بھجیندی پئی اے ، ایں انسانی امداد اچ ہنگامی دوائیں ، الیکٹرو میڈیکل آلات، موسم پالے دے بسترے تے کھاݨے دیاں چیزاں شامل ہن۔ ھک خصوصی سی ۔130طیارہ یوکرین دے لوکاں کیتے 7.5 ٹن توں ودھ انسانی امداد دیاں چیزاں پڄاوݨ کیتے روانہ تھی ڳئے جݙاں جو ھک ٻیا سی ۔130طیارہ 3 جون کوں مزید 7.5 ٹن امداد دے نال روانہ کیتا ویسی۔ پاکستان ہمیشہ ھک ذمہ وار اتے امن پسند ملک دے طور تے جھیڑیں تے و آفات دے دوران امداد دی بین الاقوامی اپیلاں دا جواب ݙیوݨ کیتے بین الاقوامی برادری دے رلے کم کیتے ۔
