وزیراعظم شہباز شریف دا دورہ ترکی ، سٹرٹیجک تعلقات تے مضبوط اقتصادی شراکت داری ودھاوݨ تے زور ، فریقین تجارت، سرمایہ کاری اتے دفاع سودھے مختلف شعبیں اچ سانجھا تعاون مستحکم کرݨ تے ڳالھ کیتی ،اعلامیہ جاری

انقرہ ۔1جون (اے پی پی):وزیراعظم شہباز شریف پاکستان تے ترکی دے درمیان سٹرٹیجک تعلقات دے مرکزی جزو دے طور تے مضبوط اقتصادی شراکت داری ودھاوݨ دی اہمیت تے زور ݙتے ، ݙوہیں ملکاں دے عوام وچال صدیوں پراݨے تعلقات محبت ، پیار، مشترکہ زبان، ثقافت اتے مذہبی ورثہ دی مضبوط بنیاداں تے کھڑن ، پاکستان مذاکرات اتے سفارت کاری دے ذریعے یوکرائن دے جھیڑے دے وختی توں وختی حل چاہندے ۔ جاری اعلامیہ موجب وزیراعظم شہباز شریف ترکی دے صدر رجب طیب اردوان نال ملاقات کیتی۔ انقرہ اچ صدارتی محل آمد تے صدر رجب طیب اردوان وزیراعظم دا استقبال کیتا۔ وزیر خارجہ بلاول بھٹو زرداری، وزیر دفاع خواجہ محمد آصف، وزیر تجارت سید نوید قمر، وزیر اطلاعات و نشریات مریم اورنگزیب، وزیراعظم دے معاون خصوصی طارق فاطمی، فہد حسین اتے سینئر اعلیٰ حکام انہاں دے رلے ہن ۔ وزیراعظم دا صدارتی کمپلیکس پڄݨ تے گارڈ آف آنر نال پرتپاک استقبال کیتا ڳئے ۔ ݙوہیں ملکاں دے قومی ترانے وڄائے ڳئن ۔ ݙوہیں رہنماواں ھک ݙوجھے نال آپݨے وفد دا تعارف کرایا ، ݙوہیں رہنماواں وفد دے بغیر ملاقات کیتی جیں دے بعد فریقین دے درمیان وفد دی سطح تے مذاکرات تھئے۔ وزیراعظم شہباز شریف آکھیے جو ݙوہیں ملک اڄوکے سال سفارتی تعلقات دے قیام دی 75 ویں سالگرہ منیندے پئن ۔ انہاں آکھیے ݙوہیں ملکاں دے عوام وچال صدیوں پراݨے تعلقات محبت ، پیار، مشترکہ زبان، ثقافت اتے مذہبی ورثہ دی مضبوط بنیاداں تے کھڑن ۔ وزیراعظم آکھیے ݙوہیں ملکاں ہر اوکھے ویلھے ھک ݙوجھے نال کھڑے رہیے تے دوستانہ تعلقات آئندیاں نسلاں کوں منتقل تھئے ۔ انہاں واضح کیتے جو ݙوہیں ملکاں دے درمیان تعلقات اعتماد، مفاہمت اتے باہمی تعاون دے ذریعے منفرد رہیے۔ فریقین تجارت، سرمایہ کاری اتے دفاع سودھے مختلف شعبیں اچ سانجھے تعاون مستحکم کرݨ تے ڳالھ مہاڑ کیتی ۔ اعلیٰ سطحی سٹرٹیجک تعاون اتے سٹرٹیجک اقتصادی فریم ورک، سانجھے تعاون دے ودھارے اچ اہم ذریعہ قرار ݙتا ڳئے۔ ݙوہیں رہنماواں اعلیٰ سطحی سٹرٹیجک تعاون (ایچ ایل ایس سی سی) ستمبر اچ پاکستان اچ منعقد کرݨ تے اتفاق کیتا تاں جو ایندے اچ پشرفت تھیوے ۔ وزیراعظم آکھیے جو پاکستان جون 2022ء اچ ترکی دے تجارتی وفد دے خیر مقدم دا منتظر اے۔ انہاں ترکی دے سرمایہ کاراں کوں پاکستان بالخصوص پن بجلی اتے قابل تجدید توانائی دے شعبیں اچ سرمایہ کاری دی دعوت ݙتی ۔