برمنگھم تے مانچسٹر ہوائی اݙیں تے رش پاروں پی آئی اے دی منسوخ شدہ پروازسنوار کوں روانہ تھیسی ، ترجمان پی آئی اے

اسلام آباد۔4جون (اے پی پی):ملکہ برطانیہ دی تخت نشینی دی 75 سالہ تقریبات دے سلسلے اچ برطانوی ائیرپورٹس تے رش پاروں پی آئی اے سودھے مختلف ائر لائنز دی برمنگھم دی پروازاں منسوخ کرݙتیاں ڳئن ، پی آئی اے دی منسوخ شدہ پرواز سنوار کوں روانہ تھیسی۔ پی آئی اے دے ترجمان عبداللہ خان دی طرفوں رات کوں جاری بیان موجب رش پاروں برمنگھم اتے مانچسٹر ایئر پورٹ تے مسافراں دی کئی سو میٹر لمبیاں قطاراں لڳ ڳئن جیں دی وجہ توں مانچسٹر تے برمنگھم ائیر پورٹس تے فلائٹ آپریشن شدید متاثر تھئے۔ ترجمان پی آئی اے موجب ائیرپورٹ تے رش پاروں مختلف ائر لائنز بشمول پی آئی اے دی برمنگھم دی پرواز منسوخ کرݙتی ڳئی ۔ پی آئی اے دی ہفتے کوں اسلام آباد توں برمنگھم ونڄݨ آلی پرواز ائیرپورٹ دے حالات پاروں منسوخ کرݙتی ڳئی اے ۔ترجمان آکھیے جو پی کے 795 ہݨ سوموار دے ݙینھ اسلام آباد توں برمنگھم ویسی ۔پی آئی اے مسافراں دی بکنگ کوں سنوار تے منتقل کرݨ شروع کرݙتے ، پی آئی اے دے کال سینٹرتوں مسافراں دے دستیاب نمبرز تے اطلاع ݙیوݨ دا کم شروع کرݙتا ڳئے ۔