اسلام آباد۔6جون (اے پی پی):چیئرمین سینیٹ محمد صادق سنجرانی بھارت دی حکمران جماعت بی جے پی دی ترجمان دے توہین رسالت ﷺ تے مبنی بیان دی شدید مذمت کیتی اے تے آکھیے جو ایں طرح دے بیانات ساری دنیا دے مسلماناں کیتے اضطراب اتے دل آزاری دا سبب بݨدن۔ سینیٹ سیکرٹریٹ موجب چیئرمین سینیٹ آکھیے جو مسلم کش اتے فسطائی بھارتی حکومت دی وجہ توں بھارت اچ مذہبی آزادی کوں شدید خطرات لاحق ہن، موجودہ بھارتی حکومت بھارت اچ وسݨ آلیاں ساریاں اقلیتاں دا جیوݨ اوکھا کرݙتے ۔ انہاں آکھیے او آئی سی اتے ٻیاں عالمی تنظیماں کوں بھارتی حکومت دی اسلاموفوبیا تے مبنی پالیسیاں دا نوٹس گھنݨا چاہیدے ، اقوام عالم اتے خاص طور تے مسلم امہ اسلاموفوبیا دے خلاف مؤثر حکمت عملی اختیار کرے۔ انہاں آکھیے جو ساری دیا دے مسلمان نبی محترم ﷺ ناموس دے تحفظ کیتے اپݨیاں جاناں قربان کرسڳدن ۔ چیئرمین سینیٹ آکھیے موجودہ صورت حال تے پاکستانی حکومت تے عوام دی تشویش سارے مہذب دنیا دی پارلیماناں تئیں پڄیسوں ۔
