جج صاحبان دی تقرری کیتے پارلیمانی کمیٹی آپݨا کم کریندی پئی اے ، انصاف دے نظام کوں بہتربݨاوݨ دی گنجائش اے ،وزیر قانون اعظم نذیر تارڑ

اسلام آباد۔9جون (اے پی پی):سینیٹ اچ قائد ایوان و وزیر قانون سینیٹر اعظم نذیر تارڑ آکھیے جو جج صاحبان دی تقرری کیتے پارلیمانی کمیٹی اپݨا کم کریندی پئی اے ، فوجداری تے دیوانی نظام انصاف کوں بہتر بݨاوݨ دی ٻہوں گنجائش اے ۔ سینیٹ اجلاس اچ سوالاں دے وقفے ویلھے سینیٹر مشتاق احمد تے سینیٹر اعجاز چوہدری دے سوالاں دا جواب ݙیندے ہوئیں انہاں آکھیے جو نظام انصاف اچ خامیاں توں پورے معاشرے اچ خرابیاں پیدا تھیندن، اٹھارویں تے انویویں ترمیم اچ بدقسمتی توں او نتائج حاصل نی کیتے ونڄ سڳیے جیڑھے تھیوݨے چاہیدے ہن ، پوری پارلیمان کوں اے سوچݨا چاہیدے جو جݙاں تئیں آئین اچ ترمیم تے قانون سازی نہ کریسوں اوں ویلھے تئیں شکایتاں رہسن ،عدلیہ اچ شفاف طریقے نال میرٹ تے تقرریاں نظام انصاف اچ بہتری کیتے ٻہوں اہمیت رکھیندن ، عدلیہ کوں ھک حد تئیں تجویز ݙتی ونڄ سڳدی اے ، مقدمیں زیر التوا ضرور ہن، فوجداری اتے دیوانی نظام انصاف کوں بہتر بݨاوݨ دی ٻہوں گنجائش اے جݙاں تئیں سول ججز تے مجسٹریٹس درست فیصلے نہ کریسن مقدمیں اچ التوا آندا رہ ویسی ، ارکان پارلیمنٹ کوں قانونی اصلاحات اچ تعاون کرݨا چاہیدے۔