صدر مملکت قومی احتساب (ترمیمی) بل 2022 ء بغیر دستخط دے ولا پٹھ ݙتے

اسلام آباد۔20جون(اے پی پی)صدر مملکت ڈاکٹر عارف علوی قومی احتساب (ترمیمی) بل 2022 ء بغیر دستخط دے وزیراعظم آفس کوں ولو پٹھ ݙتے اتے آکھیے جو میݙے خیال اچ پارلیمنٹ دا منظور کیتا اے بل رجعت پسندانہ اے جیندے نال قانون دے لمبے ہتھ مفلوج کرتے بدعنوانی کوں اڳونہی ملسی، اے بل بدعنوان عناصر، ملکی دولت لٹݨ آلے اشرافیہ کیتے ریلیف اے جو او کہیں دے جواب دار کائنی اتے او بغیر کہیں ݙر ٻھو دے لٹ مار کیتی رکھن۔ صدر مملکت افسوس کیتے جو ہݨ ہیݨا ڄݨا ہمیشہ معمولی جرائم اچ وی پکڑیندا رہسی اتے ݙاݙھے لوک ملک و قوم دی رت پی تے وی آزاد پھرسن، احتساب کوں کمزور کرݨ خلاف آئین ہی نئیں پہلے توں مسلیاں وات آئے پاکستانی لوکاں دے بنیادی حقوق دے وی خلاف اے۔ انہاں آکھیا جو ایف اے ٹی ایف کالا دھن، ٹیکس چوری، جرائم اتے بدعنوانی جھیں جرائم توں رکیندے اتے اے بل بالکل ایندے الٹ اے۔