وزیراعظم شہباز شریف دی صدارت اچ وفاقی کابینہ دا اجلاس، مقامی اتے بین الاقوامی اجارہ سکوک پروگرام، کورونا دے علاج کیتے انجکشنز دے نرخ اچ ڳھٹکی، ٹریڈ آرگنائزیشن ایکٹ دے تحت اپیلاں دی سݨیڄ کیتے کمیٹی دی نویں سروں تنظیم دی منظوری

اسلام آباد۔21جون  (اے پی پی) وفاقی کابینہ مقامی اتے بین الاقوامی اجارہ سکوک پروگرام، کورونا دے علاج کیتے انجکشنز دے نرخ اچ ڳھٹکی، ٹریڈ آرگنائزیشن ایکٹ دے تحت اپیلاں دی سݨیڄ کیتے کمیٹی دی نویں سروں تنظیم دی منظوری ݙے ݙتی اے جڈانجو وزیراعظم کساناں کوں ڳھٹ نرخ تے یوریا کھاد دی ویلھے تے فراہمی دی ہدایت کیتی اے۔ وفاقی کابینہ دا اجلاس منگل کوں اتھاں وزیراعظم شہباز شریف دی صدارت اچ تھیا۔ اجلاس دے شروع تے وزیراعظم آکھیا جو انڈونیشیا ولوں پاکستان کوں پام آئل برآمد نہ کرݨ دے فیصلے دے بعد بحرانی کیفیت ناگزیر ہئی۔ انہاں انڈونیشیا دے صدر کوں خط لکھیا اتے وفاقی وزیرِ صنعت و پیداوار مخدوم مرتضیٰ محمود توں درخواست کیتی جو او ایں معاملے کوں ذاتی طور ݙیکھن۔ انہاں انڈونیشیا دا دورہ کیتا اتے انہاں دی کوششاں دے بعد اے مسئلہ حل تھیا اتے انڈونیشیا ترجیحی بنیاداں تے پام آئل دی برآمد شروع کر ݙتی اے۔ میں انہاں کوں اتے ٹیم کوں خراج تحسین پیش کرینداں۔ وزیراعظم ، ایف اے ٹی ایف بارے آکھیا جو میں وزیر خارجہ بلاول بھٹو زرداری اتے وزیرِ مملکت برائے امورِ خارجہ حنا ربانی کھر اتے انہاں دی ٹیم دی کوششاں دی تعریف کرینداں جنہاں دی محنت اتے لگن نال ایف اے ٹی ایف دا مسئلہ حل تھیا۔ وفاقی کابینہ دے اجلاس اچ ملک اچ یوریا کھاد دی طلب تے رسد دا معاملہ تے غور کیتا ڳئیا۔ وفاقی وزیرِ صنعت و پیداوار کابینہ کوں تفصیل ݙسائی۔ کابینہ ، خزانہ ڈویژن دی سفارش تے  مقامی اتے بین الاقوامی  اجارہ  سکوک پروگرام دے اجراء دی منظوری ݙتی۔ وفاقی کابینہ ،  قومی وزارتِ صحت دی سفارش تے کورونا دے علاج اچ استعمال تھیوݨ آلےmg  100  Remdesivir Injections دے نرخ کوں 2308.63 روپے توں ڳھٹ کر تے 1892 روپے کرݨ دی منظوری وی ݙتی۔ کابینہ کوں یورپی یونین ولوں پاکستان کوں ݙتی ڳئی جی ایس پی پلس سہولت دی اہمیت، افادیت اتے اہم خدوخال بارے تفصیلی بریفنگ ݙتی ڳئی۔