اسلام آباد۔22جون(اے پی پی) عمران خان اداریاں دا غلط استعمال کریندے رہین، امریکی سازش دا بیانیہ کتھاں ڳئے جو او ہݨ نیب ترمیماں تے اریے ہوئن۔ اے ڳالھ قومی سلامتی کمیٹی دے اجلاس دے بعد میڈیا نال الیندے وفاقی وزیر قانون رانا ثنا اللہ اتے وفاقی وزیر اطلاعات مریم اورنگزیب آکھی۔ انہاں آکھیا جو ساݙھے 3 سال اچ نیب کیساں اچ کڄھ وی ہتھ نئیں لڳیا، شہباز شریف دے خلاف کیہڑے 70 کیسز ہین؟ معیز انٹرپرائز اچ عمران خان دے فرنٹ مین دا ناں آئے، نیب ترمیم دا فیدہ کیکوں تھیوݨے، برطانیہ توں ملݨ آلے پیسے تے وی عمران خان کوئی ولدا نئیں ݙتا، نجی ہاؤسنگ سوسائٹی توں 458 کنال اراضی ڳھدی ہئی او کیہڑے کھاتے القادر یونیورسٹی کوں ملی اے؟ وزیر داخلہ آکھیا جو عمران خان دا ریٹائرڈ ججاں کوں احتساب عدالت اچ لاوݨ دا مقصد انتقام کوں ودھاوݨ ہا، کیسز کوڑا ثابت کرݨ ساݙا آئینی حق اے، اساں وی عوام دے ووٹاں نال آئے ہیں تے شہبازشریف وزیراعظم ٻݨین۔ انہاں آکھیا جو عمران خان نیب ترامیم تے بیانیہ ٻݨاوݨ دی ناکام کوشش کریندے پن، 80 فیصد ترامیم تحریک انصاف دی حکومت آپ آرڈیننس نال کیتن۔ انہاں آکھیا جو اساں تاں نیب دا کالا قانون بھگت وی چکیے ہیں، نیب قوانین تے اسلامی نظریاتی کونسل، عدالت اتے کاروباری طبقے سودھا بیوروکریٹس کوں وی اعتماد اچ ڳھدے۔
